Makundano enhabvu yepamusorosoro yeCastle Lager Premier Soccer League akasvika kumagumo svondo rapera paine kusuwa kuzvikwata zvine mukurumbira zvinoti FC Platinum, Ngezi Platinum Stars, Caps United, Dynamos neHighlanders, asi kufara kune chimwe chikwata chidiki.
Chikwata cheSimba Bhora chemudhorobha duku kwazvo reShamva mudunhu reMashonaland Central ndicho chakatora mukombe weligi wegore rino ndokusiya vatsigiri vezvikwata zvikuru zvaitarisirwa kutora mukombe uyu vachitemwa nemusoro kutsvaga kuti chii chaicho chakatadzwa nezvikwata zvavo zviri kuvatadzisa kutora zvakare mukombe uyu semakore akare.
Simba Bhora yakapedza iine mapoinzi makumi matanhatu nematanhatu, mapoinzi mashanu pamusoro peFC Platinum iyo yakatora chinzvimbo chepiri, uyezve mapoinzi gumi nemaviri pamusoro peNgezi Platinum Stars, iyo yaive nemukombe uyu mwaka wapera.
Aka kave kechinomwe kakateverana mukombe usati wadzokera kuHarare kana Bulawayo kuzvikwata zvine chaunga zvinoti Makepekepe, DeMbare kana Bosso.
Pazvikwata zvitatu izvi, Caps United ndiyo yakapedzisira kutora mukombe uyu muna 2016 iri pasi paLloyd Chitembwe, uyo akadzoka kuzorairidza chikwata ichi zvakare mushure mekumboenda kuHarare City kwechinguvana.
Akambotambira Black Aces neRio Tinto, Innocent Tembo, anoti zvikwata zvine mukurumbira izvi zviri kushaya vatambi vane tarenda nemhaka yekusabhadhara zvinogutsa vatambi vepamusoro.
"Mateam edu mahombe aya ane dambudziko rekubhsdhara. Havagone kubhadhara maplayers. Asi ndivo vanogara maground avo akazara nemasupporters. Tisingazsive kuti mari dzavo dzinofamba sei," anodaro Tembo.
Chiri kurwadza vateveri veMakepekepe, Dembare neBosso ndechekuti zvikwata zvavo hazvisi kana pazvikwata zvina zviri pamusorosoro petafura.
Mugungano rezvikwata gumi nezvisere, Highlanders iri pachinzvimbo chechitanhatu iine nemapoinzi makumi mana nemasere, Dynamos ichiteverawo iri pachinhanho chesere iine mapoinzi makumi mana nematanhatu, kuchitiwo Caps United iri pachinzvimbo chechipfumbamwe iine mapoinzi makumi mana nemashanu.
Manica Diamonds, iyo ine mapoinzi makumi mashanu nemana, ndiyo iri pachinzvimbo chechina pasi peSimba Bhora, FC Platinum neNgezi Platinum Stars.
Kari kare, ingadai iri Dynamos kana Highlanders iri pamusoro, dzimwe nguva Caps United, asi mubati wepagedhe, Shepard Saizi, anoti zvikwata izvi hazvichina kurongeka sekare.
"Mateam mahombe haana kurongeka. Tarisa uone kuDynamos vatambi vanogara vachiramwa basa nekusabhadharwa. Vatambi vanoda kubhadharwa kuti vatambe nemoyo wese. Mateam manyowani arikubhadharwa," anodaro Saizi.
Asi sando dziri kuenda kuSimba Bhora iyo ichange yakamirira nyika mumakundano ezvikwata zvepamusorosoro zvemuAfrica, eCAF Champions League.
Asi chikwata ichi chine mutoro wakaoma wekusvika kana kudarika pakasvikwa neDynamos, iyo yakasvika mufainari yemakundano makuru emuAfrica aya muna 1998.
Murairidzi weSimba Bhora, Tonderai Ndiraya, uyo akadzingwa kuDynamos achinzi akundikana kudzora chikwata ichi munzira yekukunda, anoti vari kuda kuwedzera simba rechikwata kuburikidza nekutenga vamwe vatambi vashoma kuitira kuti vaoneke hurefu hwavo muAfrica.
"Tichakwnisa kumhanya mhanya kuti tichengetedze vatambi vaiitinavo, pamwechete nekutsvaga vashomancani vanosimbisa chikwata chedu," anodaro Ndiraya.
Ndiraya ndiye ari kutarisirwa kutora mukombe wemurairidzi akabata basa kukunda vamwe vose, weCastle Lager Coach of the Year, pari kupihwa mibairo vatambi vakarura kudarika vese musi weChishanu.
Mutambi weHighlanders, Lynoth Chikuhwa, ndiye akanwisa zvibodzwa zvakawandisa kudarika vatambi vese mwaka uno mushure mekukanda zvibodzwa gumi nezvinomwe.
Asi mutambi weSimba Bhora, Walter Musona, ndiye ari kunzi angangotora mukombe weSoccer Star of The Year.
Mutsigiri wemutambo wenhabvu VaTinashe Museti vanosimbisa kuti Musona, uyo akatora mukombe uyu muna 2022, ari kuusimudza zvekare mwaka uno.
"HuSoccer Star ndirikuona huchidzokeda kuna Musona. Aika da zvibodzwa nekubatsira vamwe kugohwesa," anofungidzira Museti.
Mumwe mutsigiri wemutambo wenhabvu, VaFrancis Kahowa, vanoti vari kuona Musona achiteverwa naKhama Billiart weYadah mumakundano eSoccer Star aya.
"Ukada kugarisa history yedu yebhora. Khama haana kutamba muZimbabwe kwenguva refu. Paakadzoka, akabata moto, akakanda zvibodzwa zvinoyevedza kuYadah,"' anodaro Kahowa.
Zvakamira zvakadaro, PSL iri kuonekana neBulawayo Chiefs, Hwange, Chegutu Pirates neArenel Movers, zvikwata zvina zvakaburitswa mugungano iri.
Zvikwata zvinoti KweKwe United, Scottland, ZPC Kariba, nechichabuda pakati peWangu Mazodze neTriangle kuEastern Region ndizvo zvichavatsiva muPSL kubva kuDivision One.
Mabiko ekugamuchidza mibairo kuvatambi vakatamba zvakanwisa mvura kukunda vamwe, murairidzi wepamusorosoro pamwe nemuridzi wepembe akabata basa zvakanaka ari kuitwa neChishanu chino ndiwo achavhara mwaka wenhabvu yepamusoro yePSL mwaka uno.
Forum