Zvichitevera kubviswa kwemutongo werufu mubumbiro remitemo nenyika mushure mekunge mutungamiri wenyika VaEmmerson Mnangagwa vasaina bhiri raitsvaga kubviswa kwemutongo werufu kuti rive mutemo, Death Penalty Abolition Bill, vakawanda munyika vanoti vari kutambira danho iri nemufaro vachipembedza hurumende.
Asi kune vamwewo vari kuti danho iri rinogona kutowedzera kuparwa kwedzimhosva dzekupondana vachiti mhondi dzinenge dzisisatye kuurayiwawo sezvo mutongo werufu wabviswa.
Sangano reAmnesty International muZimbabwe rakapembedza danho rakatorwa nehurumende iri asi richishoropodza chikamu chekuti mutongo uyu unogona kuzombodzoswa woshanda kwenguva pfupi pasi pechikamu cheDefence Act chiri mumutemo uyu, icho chinopa mutungamiri wenyika masimba ekumbodzosa mutongo werufu kwenguva pfupi kana zvinhu zvaita manyama amire nerongo, kana kuti State of Emergency.
Vanoongorora zvematongerwo enyika vari gweta uye vari nhengo yeZanu PF, Doctor Masimba Mavaza, vanoti vanofara nedanho rehurumende iri vachiti nyika haingararame nemutemo unoti abaya ziso remumwe ngaabayiwewo, vachiti izvi zvinoguma nyika yazara nemapofu.
Nyanzvi mune zvematongerwo enyika vachidzidzisa paTswane University of Technology muSouth Africa, Muzvinafundo Munyaradzi Ricky Mukonza, vanoti vanotenderana naDoctor Mavaza kuti mutongo werufu unofanirwa kubviswa.
Asi Muzvinafundo Mukonza vanoti vanoshushikana nechikamu chinopa mutungamiri wenyika masimba ekumbodzosa mutongo werufu pavanoona panenge pakakodzera, vachiti vanotyira kuti unogona kuzoshandisirwa vemapato anopikisa.
Asi Doctor Mavaza vanopokana nemaonero aya vachiti havaoni hurumende ichizoshandisa mutemo uyu kudzvanyirira vanoipikisa.
Forum