Mutungamiri webato rinopikisa kuMozambique reOptimist Party for the Development of Mozambique kana kuti PODEMOS VaVenancio Mondlane avo vange vamboenda muhupoteri vadzokera kunyika iyi nhasi vakatambirwa nezviuru nezviuru zvevatsigiri vavo.
Zvinhu hazvina kugadzikana muMozambique kubva zvaitwa sarudzo gore rapera idzo dziri kunzi nevanopikisa dzakabirirwa zvemhando yepamusoro nebato riri kutonga reFrelimo. Asi bato iri riri kuramba mashoko aya.
Mapurisa anonzi ange achiita hwakiti nagonzo nevatsigiri vaVaMondlane akavandira hutsi hunokatyidza paMavalane International Airport muMaputo pavasvika. Vanhu vatatu vanonzi vafa mukunetsana uku.
Kutengeserana
Asi kusagadzikana kuti muMozambique uku kunonzi kwave kukanganisa zvakanyanya nyaya dzekutengeserana muSADC.
Nyika dzakawanda mudunhu dzinosanganisira Zimbabwe dzinoshandisa nzira nenjanji dzinodarika nemuMozambique pakutenga nekutenegsa zvinhu. Zimbabwe inoshandisa Beira Corridor sezvo isina nzira yekuenda kunyanza.
Nyanzvi munyaya dzezvehupfumi Doctor Eddie Mahembe vanotungamira kambani yeUnderhill Corporate Solutions vaudza Studio 7 kuti zvakakosha kuti dambudziko rekuMozambique rigadziriswe nechimbichimbi.
Forum