Mutungamiri wenyika VaEmmerson Mnangagwa nhasi vatungamira hurongwa hwekucherechedza zuva revechidiki kana kuti naNational Youth Day kuZimbabwe International Trade Fair kuBulawayo.
VaMnangagwa vati vari kushushikana zvikuru nenyaya yekuti vechidiki vakawanda munyika vari kushandisa zvinodhaka zvinonzi nenyanzvi munyaya dzezvehutano zvave kukanganisa pfungwa dzavo.
Pakurwisa dambudziko iri, VaMnangagwa vati hapana anofanira kunzi ari pamusoro pemutemo.
Vati, “Vanotengesa zvinodhaka vari fanirwa kukufumurwa vabatwe nemutemo uye nzira dzvavanotengesa nadzo dzinofanirwa kuvharwa.”
Vatizve, “Vanhu mumadhorobha nekumamisha vanofanirwa kurega tsika yekuchengetedza vanotyora mutemo.Ndinokurudzira tose kuti tishande pamwe nemapurisa uye nevamwe vezvemitemo kuti tipedze dambudziko iri.”
Ongororo yakaitwa neimwe nyanzvi munyaya dzezvemagariro evanhu VaIshmael Mugari inoratidza kuti vechidiki vanodarika zvikamu makumi mashanu nemanomwe kubva muzana, 57% vari kushandisa zvinodhaka.
Zviri kushandiswa zvinosanganisira mutoriro, dombo, guka nezvimwe. Vamwe vari kushorawo hurumende vachiti havana zvakawanda zvairi kuita kusunga vanotengesa zvinodhaka. Asi mapurisa ari kuti ari kusunga vanhu vakawanda.
VaMnangagwa vakurudzirawo vechidiki kuti vaite mabasa anosimudzira nyika yavati yakauya neropa. Vati, “Ndinokukurudzirai kuti murambe muchishandira nyika yedu zvakasimba, nenzira inoratidza kuda nyika yenyu zvizere.” Vatizve, “Rambai zvose zvingade kuitwa neavo vanoda kukupatsanurai uye kupatsanura nyika yedu.”
Mutungamiri wenyika vatorawo mukana uyu kuparura chirongwa cheZimbabwe Digital Skills Programme icho chanzi chiri kuitwa nerubatsiro runobva kunyika yeUnited Arab Emirates chichadzidzisa vechidiki vanosvika miriyoni nezviuru mazana mashanu zvirongwa zvakasiyana-siyana zvemacomputer kusanganisira Coding.
MuZimbabwe dambudziko guru riri kusangana nevechidiki ndere kushaya mabasa. Makambani mashoma achiri kubaira vanhu zvitupa ave kuvharwa kana kuti ari kugumura vashandi.
Masangano anomiririra vemabhizimisi akaita seZimbabwe National Chamber of Commerce ne Confederation of Zimbabwe Industries anoti mitemo iri kudzikwa nehurumende zvikuru kuvamanikidza kushandisa mari yeZiG isina kudzikama nekutara mitengo zvakanganisa zvikuru mabizimisi.
Sachigaro wevechidki muZanu-PF muBulawayo VaFreedom Murechu vati vafara kuti kucherechedzwa kwezuva iri kwaitirwa muBulawayo gore rino. Vatiwo vafare nekuparurwa kwechirongwa cheDigital Skills Programme.
Mumwewo wechidiki Tinaye Dube atiwo chirongwa ichi chakanaka akati vechidiki vanofanirwa kupiwa mikana wekupinda machiri zvisina rusaruro rwezvematongerwo enyika mukati.
Vachipawo pfungwa dzavo nezvezuva ranhasi, nhengo yebato rinopkisa reCitizens Coalition for Change VaSwithern Chiroodza vaudza Studio 7.
Zuva reNational Youth Day rakatarwa mugore re2017 uye gore rino range richitwa pasi pedingindira rakakanangana nekusimudzira vechidiki neremangwana ravo kana kuti, "Empowering Youth, Securing the Future."
Forum