Mutungamiri wenyika yeAmerica VaDonald Trump vakasaina mutemo wechimbichimbi unotuma chikwata chavo kuti chibude nehurongwa hwekudzoseredza kuenzaniswa mukutengeserana kunoitwa neAmerica nekupikisana nezvibvumirano zvisingaenzanisi zvainowana kubva mukutengesarana ainoburitsa.
Mugwaro rawakaburitsa, muzinda weWhite House wakati hurongwa hwekutengeserana kwakajeka hwe “Fair and Reciprocal Plan,” hwakanangana nekugadzirisa kusaenzana mukutengeserana nedzimwe nyika kwave nenguva yakareba nekuona kuti paita kuenzana mune zvose.”
America ndeimwe yemisika yekutengeserana yakasununguka zvakanyanya mupasi rose. Asi kwenguva ndefu, ndiyo yanga ichirasikirwa mukutengeserana uku kana zvichienzaniswa nevainotengeserana navo, avo vanovhara misika yavo kuzvigadzirwa zveAmerica kuburikidza nemitero.
Muzinda weWhite House wakanyora uchiti “Kusaenzana kwezvinowanikwa kubva mukutengeserana uku hakuna kunaka uye kunowedzera mukudzikira kwemari inobva muzvitengeswa zvepagore.”
Mutungamiri wenyika VaTrump vakarumbidza enzaniso nekujeka kwechirongwa ichi:
“Chero chavanotibhadharisa, isu tiri kuvabhadharisa. Saka, zvinoshanda chaizvo. Iyi inzira yakanaka, yakareruka. Uye hatifaniri kunetseka pamusoro pekuti, ‘Gee, tiri kuchaja mari yakawandisa kana kuti yakanyanya kuita shoma.’”
Muzinda weWhite House wakataura mienzaniso yakawanda yemitero isina kuenzana iyo yakakuvadza America mukutengeserana, zvimwe zvacho, zvikamu gumi kubva muzana zvakaiswa neEuropean Union pamotokari dzinopinda, zvichienzaniswa nezvikamu zviviri nezviga zvishanu kubva muzana zvakaiswa neAmerica, zvikamu gumi nezvisere kubva muzana zvemutero wekutengesa ethanol kunze kwenyika wakadzikwa neBrazil zvichienzaniswa nezvikamu zviviri nezviga zvishanu kubva muzana zvakadzikwa neAmerica.
Muzinda weWhite House wakati, "Nekuda kwekuwedzera kwezvimhingamipinyi zvisingadzoreki mumakore mashoma apfuura, America ikozvino yakarasikirwa nemabhiriyoni makumi mana emadhora muna 2024 ekutengeserana mune zvekurima.
VaTrump vakati, "Kudzorera kunoita kuti mutero uve wakaenzana." Vakasimbisa, zvisineyi, kuti pane nzira imwechete yechokwadi yekuti nyika dzidzivise mitero yeAmerica zvachose:
“Vanogona kuvaka fekitari pano, chivakwa kana chingave chii kuno, uye zvinosanganisira zvekurapa, zvinosanganisira motokari, zvinosanganisira ma chips nema semiconductor. Izvo zvinosanganisira zvese. Kana iwe ukavaka kuno, iwe hauna mutero chero upi zvawo. Uye ndinofunga kuti ndizvo zvichaitika. Ndinofunga kuti nyika yedu ichazara nemabasa.”
VaTrump vakati mutemo wavo wechimbichimbi pamitero inotsividzawo "chimwe chezvinhu zvakakosha" chavakasaina. Uye kwete kungoti ichaita kuti America isimbe, vachiti "Inogona kuita kuti dzimwe nyika dzisimbe zvakare."
Vakati, “Munoziva, dzimwe nyika dzinoda kuti kuve neAmerica yakasimba. Vanoda kuva neAmerica yakasimba. Uye ndinofunga zvichatisimbisa zvakanyanya."
Ayo anga ari mashoko anoratidza maonero ehurumende yeAmerica andakuverengerai.
Forum