Zimbabwe yabatana nepasi rose mukucherechedza zuva rekuchengetedzwa kwemutauro waAmai, reInternational Mother Language, hurumende ichikurudzirwa kuti itora matanho asimbisa kuchengetedzwa kwemutauro waAmai.
Vakambove mukuru weNational Arts Council of Zimbabwe vari munyori wemabhuku uye vachikurudzirawo zvakare kuchengetedzwa kwemutauro wekuberekwa nawo, VaElvas Mari, vanoti izvi zvinogoneka chete kana hurumende yakaisa parutivi mari yekushandisa mukuitwa kwetsvakiridzo.
"Izuva ratinofanirwa kurangarira kureva kuti dei paiswa mari inoiswa mutsvakurudzo, yatinoti research iya iyi, kuitira kuti mutauro wedu usimukirewo usvike pamatanho emimwe mitauro yatinongoona iyoyi yave kushandiswa munzvimbo dzakawanda. Mitauro yanga ingori mitauro yaAmai asi yasimukira zvikuru," Vamari vanotsanangura.
Vanoti munyika hamuchina chido chekuverenga mabhuku emutauro waAmai, izvo zvadzikisa zvanyanya kudzidzwa kwemitauro yekuzvarwa nayo muzvikoro.
"Tingangoti muZimbabwe takambosvika pane danho rekuti taakuona kuti pane zvinhu zvikuru zviri kuitika pakusimudzira nekurangarira mutauro wedu. asi ndinoona neziso rekunge tadzokera kumashure nokuti vana vechidiko vataanavo, mabhuku mabhuku haachawanika muzvinyorwa."
Vanoti hurumende inofanirwawo kuita zvirongwa zvinotevera vana veZimbabwe vari kunze kwenyika vachidzidziswa mitauro yavo yekuberekwa nayo sezvinoitwa nezvizvarwa zvenyika dzakaita seBritain, Germany neFrance, izvo zvinodzidzisana mitauro yazvo kunyange zviri kune dzimwe nyika.
VaMari vanopawo mufananidzo wezvizvarwa zveAmerica izvo vanoti zviri kuita zvirongwa zvakanangana nekuisa zvakare America pamberi, kana kuti Make America Great Again, vachiti ndizvo zvinofanirwa kuitwawo mukusimudzira mutauro waAmai munyika.
Zuva remutauro waAmai rakatarwa nechinangwa chekusimudzira kuchengetedzwa kwemitauro yose inoshandiswa nevanhu pasi rose, sezvakatarwa nesangano reUnited Nations muna 2007.
Zimbabwe ine mitauro gumi nemitanhatu inoshandiswa munyika, kusanganisira mutauro wemaoko, kana kuti Sign Language.
Forum