Mapurisa aburitsa mashoko ekuti ari kutsvaga mutori wenhau Blessed Mhlanga achimupomera mhosva yekutyora mutemo weCriminal Law (Codification and Reform) Act, Chapter 9:23. Asi havana kutaura kuti akapara mhosva yeyi chaizvo.
Mumazuva adarika, Blessed ange achiita hurukuro nevakarwa hondo yerusungunuko kusanganisira VaBlessed Geza nhengo yeCentral Committee yebato reZanu-PF vari kuti mutungamiri wenyika VaEmmerson Mnangagwa vakundikana basa uye vave kufanira kusiya chigaro.
Izvi zvinotevera kurudziro yevamwe muZanu-PF yekuti bumbiro remitemo rivandudzwe kuti sarudzo dzisaitwe muna 2028 kuti mutungamiri wenyika VaMnangagwa vatonge kusvika muna 2030.
Mapurisa anotiwo ari kutsvaga VaGeza vave kupomerwa mhosva yekuzviza mutungamiri wenyika nekupesvedzera mhirizhonga. Gweta raBlessed, VaChris Mhike vaudza Studio 7 kuti mapourisa haasi kunyatsojekesa kuti vari kumupomera mhosva ipi chaizvo.
Zvichakadaro, mapurisa nezuro akambodaidza kukamba yawo kuHarare Central mudzimai waVaGeza, Amai Roseline Ndaizivei Tawengwa kuti avabvunzurudze nezvemurume wavo ari kutsvagwa nematikitivha eCID. Aka ndekechitatu mudzimai waVaGeza achibvunzurudzwa nemapurisa nezvekuti vari kupi.
Forum