Muzinda weZimbabwe kuSouth Africa unoti uri mushishi kushanda nemapurisa emuSouth Africa neekuZimbabwe kuti vakwanise kuziva mazita ezvizvarwa zveZimbabwe zvakafira mumugodhi weStilfontein pamwe nezvakasungwa mushure mekubuda mumugodhi uyu zviri zvipenyu.
Mumiriri weZimbabwe muSouth Africa, VaDavid Hamadziripi, vanoti kusvika pari zvino mitumbi makumi maviri nemishanu yakwanisa kuzivikanwa kuti ndeyezvizvarwa zveZimbabwe, uye pamitumbi iyi, mishanu ndiyo chete yakwanisa kuzivikanwa nehama dzayo.
VaHamadziripi vanoti vakakwanisawo kuwana humbowo hwe DNA kubva kune vamwe vari kuZimbabwe vanofungidzira kuti hama dzavo dziri muSouth Africa dzingadai dziri pavanhu vakafira mumugodhi uyu.
Mashoko ari kubva kuSouth Africa anoti mitumbi makumi mapfumbamwe pamitumbi makumi mapfumbamwe nemitatu yevanhu vakafira mumugodhi uyu haisati yatorwa nehama dzayo.
Mitatu yakatorwa nehama dzayo inonzi ndeyezvizvarwa zvenyika yeMozambique.
Asi VaHamadziripi vanoti ivo vakaudzwa kuti kwakanga kuine mitumbi makumi masere neminomwe.
Mumiriri weZimbabwe vakurudzirawo zvizvarwa zveZimbabwe kuti zvifambe zviine magwaro nguva dzose pazvinenge zviri kuitira kurerutsa dambudziko rakaita sairori rekuti munhu anofa oshaikwa kuzivikanwa kuti ndiyani uye ndewekupi.
Zvizvarwa zvenyika dzekuchamhembe kweAfrica kusanganisira zvekuZimbabwe zvinonzi zvaishanda zviri kunze kwemutemo mumugodhi uyu, uyo wakanga wavharwa.
Vanhu ava vakazofa nekushaya chikafu nemvura mushure mekunge mapurisa azivisa kuti aida kuvasunga asi ivo vachibva varambaira pasi pemugodhi.
Forum