Vamwe vagari vemuguta reHarare vari kuchemachema nekuda kwekusafamba zvakanaka kwedzimotokari mumigwagwa mizhinji inobva mukatikati meguta iri, zvikuru sei kana kwanaya.
Vamwe vanoti vari kunonoka kusvika kumabasa kana kuzosvika kudzimba pakati pehusiku, nekuda kwekuti motokari dzinenge dzangoungana panzvimbo imwechete, dzisisafambi.
Mumwe weavo vari kuchema nemotokari dziri kutadza kufamba zvakanaka muguta reHarare kana kwanaya ndiVaPeter Nyapetwa, mugari wemumusha wevazhinji weEpworth zvekare vari munyori wesangano rinomirira kodzero dzevagari vemunzvimbo iyi, reEpworth Residents Development Association.
VaNyapetwa vati, “Vatyairi ndivo vanondikatyamadza kuti vanenge vabatwa nemweya upi kana kukangonaya.” Vatiwo, “ Vanenge vave kungofamba vasingatevedzi mitemo yepamigwagwa. Chero pamharadzano vanenge vasisadi kumira. Vemakombi vanobva vakwidza mitengo yavo. Panenge pakaipa zveshuwa.”
Asi mukuru wesangano rinomirira kodzero dzevatyairi vemakombi muHarare, reZimbabwe United Deregulated Commuter Operators, VaFrederick Maguramhinga, vanoti makombi anofamba zvakanaka muguta, asi vanakurira nyoka mhenyu kune vemishikashika vavati ndidzo nhubu.
“Isu vatyairi vedu vanofamba zvakanaka chose, asi mukazvitarisisa, vanotakura vanhu mudhorobha zvisiri pamutemo ndivo vanokonzeresa kupiringishana kwemotokari nevanhu muguta redu.” VaMaguramhinga vaudza Studio 7.
Vatiwo, “ Pane pakamboitwa basa rekusunga mishikashika iyi tikaona guta richichena uye motokari dzichifamba zvakanaka chose. Dai mapurisa ambosunga vanhu ava zvekurevesa.”
Dzimwe nguva vatyairi vedzimotokari vanogara pamigwagwa kwemaawa anodarika mashanu parwendo rwunomboita maminitsi makumi matatu- motokari dzakatsikirirana kunge hove dzemugaba, dzisingafambi.
Izvi zvinokonzerawo kuti mota dzinobatsira veruzhinji dzakaita semaamburenzi, dzinodzimura moto nedzemapurisa dzitadze kufamba nyore, izvo zvinozoisa hupenyu hwevamwe munjodzi huru.
Vanhuwo zvavo vanotadza kusvika kudzimba nenguva, kuchitiwo mafuta edzimotokari anopera munhu asina kwaamboenda, zvinozopinda muhomwe dzevatyairi.
Vamwe vanoti chiri kupa kuti migwagwa iite wada watonga muzinda wenyuchi inyaya yekuti vanotyaira makombi nemishikashika vanenge vachiita nhange mutange vachida kuti vaite nzendo dzakawanda kuitira kuti vatambirewo mari iri nani pazuva.
Asi VaNgoni Katsvairo, sachigaro wesangano rinomirira varidzi vemakombi muHarare, reGreater Harare Commuter Operators, vanozviramba. VaKatsvairo vatiwo, “Vanhu vanotaura zvavasingazivi.”
Vaenderera mberi vachiti, “Unonzwa zvichinzi tinoda mari dzinosvika kuUS$120 pazuva kubva kuvatyairi vedu, asi mari dzatinotoda dzinosvika kuUS$70 pazuva. Tiri mubhizimusi uye tinozivawo kunetsa kuri kuita zvinhu, naizvozvo hatingaiti hutsinye. Chimwe ndechekuti, vatyairi vedu vane mapepa akakwana ekuti vange vachityaira. Hatingarambi hedu kuti vanogona kunge varipo vasina zvinodiwa, asi vazhinji vanazvo. Saka havasi vatyairi vedu vanokonzeresa kusafamba kwemota muguta reHarare.”
Mutauriri weZRP mudunhu reHarare, Inspector Luckmore Chakanza, vayambirawo veruzhinji kuti varemekedzewo mapurisa anenge ari pamharadzano dzemigwagwa achibatsira kuti motokari nevanhu zvifambe zvakanaka.
VaChakanza vati, “Pamharadzano zhinji dziri muguta, panenge paine mapurisa.” Vatiwo, “Asi unoona vamwe vatyairi vasingadi kuteerera zvinenge zvichiitwa nemapurisa aya. Izvi zvinokonzera kuti motokari dzirambe dzichiungana panzvimbo imwechete.”
Mutauriri wechikamu chehurumende chinoona nezvekufamba zvakanaka pamigwagwa, cheTraffic Safety Council of Zimbabwe, Amai Lucy Kuwandira, vakurudzirawo vatyairi vedzimotokari kuti vatevedze mitemo yemumigwagwa.
Amai Kuwandira vati, “Highway Code yedu ine mitemo iri pachena inofanira kutevedzwa nevatyairi, asi tinoona vanhu vachiita zvavanoda mumigwagwa.” Vatizve, “Semuenzaniso, pane vanotanga kutyaira vakatarisana nedzimwe motokari, zvinova zvisingatenderwi. Tikatevedza mitemo yepamigwagwa, ndinoona tichikunda dambudziko iri.
Mutauriri weKanzuru yeHarare, VaStanely Gama, vakaudza Studio 7 kuti dai kanzuru ichipiwa mari inoringana nehurumende kubudikidza nechikamu cheZINARA, zvichida dai migwagwa ichigadzirwawo sezvo mizhinji ichinzi haichina kumira zvakanaka, izvo zvokanganisa mafambiro edzimotokari.
Asi vamwe vanoti hapasi kuda kungogadziridzwa migwagwa chete, asi kuitambanudza kuti ikure vachiti motokari dzawandisawo muguta guru umu.
Dambudziko rekuungana kwemotokari panzvimbo imwe muHarare rinowanzoitika mangwanani nemanheru oga oga, vanhu pavanenge vachienda nekudzoka kumabasa.
Dambudziko iri rinozonyanyisa kana kwakanaya sezvo mimwe migwagwa ichizotadza kufambika yazara nemvura iyo inenge isiri kuraswa nekuda kwekuvhara kwemigero inofanirwa kunge ichiita basa iri.
Izvi zvinonzi zvave kuita kuti vanhu vemuHarare vaseke zvavo vachiti kana kwanaya motokari dzemuguta ravo dzinofuta, dzotadza kukwana zvakanaka mumigwagwa.
Forum