Nhasi mapurisa ange akazara panze pedare ramejastiri reRotten Row muHarare pange pachinzwikwa achikumbiro chemutori wenhau Blessed Mhlanga chekuti atongwe achibva kumba pamhosva yaari kopomerwa yekupesvedzera mhirizhonga.
Izvi hazvina hazvo kumisa vanhu kupinda mudare kunoratidza kutsigira kwavo Blessed. Asi mutongo hauna kuzopihwa sezvange zvakatarisirwa.
Mutongi ange achifanira kutura mutongo VaFarai Gwitima vanzi havana kukwanisa kuuya sezvo vange vaenda kurufu. Izvi zvaziviswa nemutongi Marehwanazvo Gofa. Gweta Blessed VaChris Mhike, vanoti hapana zvavangaite havo kana pafiwa asi zvinopa kuti Blessed agare mutirongo kwenguva yakareba.
VaMhike vazivisawo kuti vachuchusi vasvitsawo kudare zvakabuda mutsvakiridzo yavakaita mushure mekunge vagunun’una kudare kuti Blessed haana kubatwa zvakanaka paakasungwa.
Asi mapurisa anonzi ange achirambidza vatori venhau kutora mifananidzo. Gweta rinorwira kodzero dzevanhu, VaKudzai Kadzere, vashora kushungurudzwa kwaitwa vatori venhau, magweta nevamwe vange vauya kudare.
Vanhu vakawanda kusanganisira vatori venhau vapinda mudare nhasi kuzoratidza kutsigira kwavo Blessed.
Vange vari mudare vanosanganisira gweta VaMunyaradzi Gwisai, vakambomirira Zengeza West mudare reparamende VaJob Sikhala nemutungamiri webato rinopikisa reTransform Zimbabwe VaJacob Ngarivhume.
Mumwewo ange ari mudare ndewechidiki mubato reCitizens Coalition for Change Steven Sarkozy Chuma uyo ati vange vauuya kuzotsigira Blessed pamwe nekutapwa kwenhau kwakasununguka.
Hatina kukwanisa kubata mutauriri wemapurisa, Commissioner Paul Nyathi kuti tinzwe divi ravo panyaya iyi.
Asi vanoona nekufambiswa kwebasa musangano weMedia Alliance of Zimbabwe VaNigel Nyamutumbu vati vachasangana nevakuru vemapurisa pamusoro pezvaitika nhasi.
Blessed akasungwa nemusi weMuvhuro mushure mekuzvipira kumapurisa. Ari kupomerwa mhosva yekuburitsa panhepfenyuro yeHeart and Soul TV mashoko akataurwa nenhengo yeZanu PF uye vari murwi wehondo yerusununguko, VaBlessed Geza, ekuti mutungamiriri wenyika, VaEmmerson Mnangagwa vatadza kutungamira nyika uye vanofanira kusiya basa kana vakatadza vobviswa.
Mutori wenhau Blessed ari kupomerwawo mhosva yekuburitsa mashoko aVaGezi apo vaiyambira mukuru wemapurisa Commissioner Stephen Mutamba kuti ivo nemapurisa avo vachazvionera pamhuno sefodya kana pakaita anosungwa nenyaya yekuti VaMnangagwa vatadza basa. VaMhike vanoti Blessed haana chaakatadza sezvo aingoita basa rake.
Mune imwewo nyaya yange iri kumatare, dare repamusoro, reHigh Court nhasi razivisa kuti richanzwa nyaya yeJudicial Service Commission (JSC) iri kupikisa mutongo wakapihwa neZimbabwe Media Commission Public Information Committee wekuti ipe mutori wenhau Mlondolozi Ndhlovu, zvakabuda mubvunzo dzevatongi vedare repamusoro dzakaitwa gore rapera sezvinodiwa pasi pemutemo weFreedom of Information Act yave kuzonzikwa musi wa20 Kurume.
Mutemo weFreedon of Information unopa veruzhinji kodzero yekuwana zvavanoda ruzivo rwezvavanoda kubva kumapazi nemakambani ehurumende kana zviri zvinhu zvisingapinze nyika munjodzi kana kuti kufukura hapwa.
Muneimweyo nyaya dare reHigh Court razivisawo kuti nemusi wa13 Kurume richanzwa nyaya yevanozviti ndivo munyori webato rinopikisa reCitizen Coalition for Change VaSengezo Tshabangu yekuti vasadzingwe mudare reparamende.
VaTshabangu vakadzingwa mubato mushure mekubatwa nemhosva yekusaremekedza bumbiro remitemo rebato. apo vakabvisa pazvigaro kuparamende dzimwe nhengo dzebato iri.
VaTshabangu vari kuti vakavadzinga, VaWelshman Ncube havana simba rekita izvi vachiti havasisiri mutungamiri uye pabofanira kuitwa sarudzo itsva dzevatungamiri.
VaTshabangu vari kuti vakavadzinga, VaWelshman Ncube havana simba rekita izvi vachiti havasisiri mutungamiri uye pabofanira kuitwa sarudzo itsva dzevatungamiri.
Forum