Amai Lake vaive mutori wenhau kwemakore makumi matanhatu vasati vasarudzwa nemutungamiri wenyika VaDonald Trump kuti vatungamire nhepfenyuro yeVoice of America (VOA).
Kudomwa kwaAmai Lake kwakati nonokei sezvo dare reSenate risatiwo ratambira VaL. Brent Bozell 111 vakanzi vave mukuru weUSAGM.
VOA yakamirirawo kudomwa kwebhodhi idzva kubva kumapato ose rinozosarudza vanenge vachitungamira mapazi akasiyana siyana nekudzinga vanenge vakundikana.
Vakafanobata chigaro chemukuu weVOA kana kuti Chief Executive VaRoman Napoli ndivo vakazivisa nezvekutanga basa kwaAmai Lake mutsambambozha kuvashandi. VaNapoli vakafanobata chigaro chakasiiwa naAmai Amanda Bennet avo vakazivisa kuti vainge vasisadi kuendererera mberi nebasa.
VaNapoli vati Amai Lake vane hunyanzvi hwepamusoro munyaya dzezvekutepfenyura sezvo vakapedza makore akawanda vari mutori wenhau kunhepfenyuro dzepamusoro soro.
Semutori wenhau Amai Lake vakamboitawo hurukuro nevatungamiri venyika yeAmerica vaviri uye vakapihwa mibayiro yeEmmy yekutora nhau dzekune dzimwe nyika kaviri.
VaNapoli vanoti sechipangamazano chaVaTrump, Amai Lake vachange vachibatsira USAGM kuti ikwanise kuzadzikisa zviri kudiwa nehurumende pamashandiro enhepfenyuro iyi.
USAGM inotepfenyura nhau kune dzimwe nyika ichisvika kuvanhu vanosvika mamiriyoni mazana mana nemakumi maviri kana kuti 420 million pasvondo.
Nhepfenyuro dziri pasi peUSAGM dzinosanganisira VOA, Office of Cuba Broadcasting, neRadio Free Europe/Radio Liberty, Radio Free Asia, Middle East Broadcasting Networks, Open Technology Fund ne Frontline Media Fund.
Kunze kwekushanda nenhepfenyura dzisina kwadzakarerekera idzi, USAGM inoti chinangwa chayo ndechekuudza vanhu chokwadi uye kubatanidza vanhu pasi rose kutsigira hutongo hwejekerere.
VaNapoli vanoti ruzivo rwuna Amai Lake rwuchabatsira zvikuru kunyatsoburitsa pachena pamire hurumende yeAmerica ichitungamirwa naVaTrump pakudyidzana kwayo nedzimwe nyika. Vanoona nezvekudyidzana neruzhinji muUSAGM havana kukwanisa kunzwa divi reVOA panyaya iyi.
Mutemo weAmerica haubvumidze USAGM kuti iudze vatori venhau zvekunyora.
Nhepfenyuro dziri pasi peUSAGM dzinoshandiswa kutaura chokwadi kuti vanhu vasataurirwe manyepo sezvaiitwa nenhepfenyuro dzeNazi Germany muhondo yepasi rose yechipiri kana kuti World War 11.
Asi inomboshorwawo ichinzi inorerekera divi uye kusanyatsobvunzurudza vatori venhau vanenge vachida kupinzwa basa zvinozokanganisa kudzivirirwa kwenyika.
Amai Lake vakataura nezvemamwe matambudziko eUSAGM aya pavakataura pamusangano weConservative Political Action Conference svondo rapera.
Vakaudza vanhu pamusangano uyu kuti chinangwa chavo ndechekuona kuti VOA yaburitsa nhau dzechokwadi.
VOA yave nemakore makumi masere nematatu ichitepfenyura.
Amai Lake vanoti dzimwe nguva yaiita basa nemazvo asi dzimwe nguva ichikundikana. Vakati pane hondo yemashoko iripo pasi rose asi vakati chombo chikuru kutaura chokwadi.
Vakati nhepfenyuro yeVOA inofanira kuva chombo chechokwadi. Vamwe vari kuti ivharwe vanosanganisira chipangamazano chaVaTrump VaEllon Musk.
Asi Amai Lake vakati VOA haisi kuzoita kunge nhepfenyuro yeterezvizheni yaVaTrump. Vakatizve haisi kuzoita kunge nhepfenyuro dzinovenga VaTrump dzakaita seCNN, MSNBC, PBS, '60 Minutes,' nemapepanhau akaita seWashington Post ne The New York Times.”
Amai Lake vakasiya basa rekutora nhau kuArizona vachiti vainge vasisafare nenhau dzisiri dzechokwadi dzainge dzaburitswa. Vakapinda musarudzo dzekuita gavhuna uye seneta kuArizona asi havana kubudirira.
Nyaya iyi yabva kuna Jessica Jerreat VOA News mukaiverengerwa naMarvellous Mhlanga Nyahuye VOA Zimbabwe Service.
Forum