Mutori wenhau anoshandira kambani yeAlpha Media Holdings, Blessed Mhlanga, nhasi arambirwa nedare ramejasitiriti chikumbiro chake chekuti abvise mari yechibatiso kuitira kuti atongwe achibva kumba pamhosva yaari kupomerwa yekupesvedzera mhirizhonga.
Mhlanga, uyo akasungwa nemapurisa neMuvhuro svondo rino achipomerwa mhosva yekutyora chikamu 136 chemutemo we Criminal Law (Codification and Reform), anzi nemutongi wedare ramejasitiriti VaFarai Gwitima adzoke zvakare mudare musi wa14 Kurume, unove mwedzi unouya kuti atange kutongwa.
Ari kupomerwa mhosva yekupa murwi werusununguko vari nhengo yeCentral committee yeZanu PF, VaBlessed Geza, mukana wekutaura pamusoro pekuti mutungamiri wenyika, VaEmmerson Mnangagwa vasiye chigaro chekutungamira nyika vachiti vakundikana.
Pakurambira Mhlanga kuti atongwe achibva kumba, muchuchisi wehurumende ati zvichida kana akabuda muchitokisi anogona kuzonokanganisa vafakazi vanotarisirwa kuzomuroverera panyaya iyi, vanosanganisira vamwe vaanoshanda navo.
Asi gweta raMhlanga, VaChris Mhike, vati muchinguva chisipi vari kumhanya kudare repamusoro reHigh Court kunopikisa zvaturwa nedare ramejasitiriti izvi.
“VaMhlanga havasi kufara nemutongo wapiwa uyu, naizvozvo, tava kufambira mapepa akanyorwa zvese zvakaitika mudare ramejasitiriti, kubva kumunyori wedare, " VaMhike vaudza Studio 7.
Vaenderera mberi vachiti, "Kana tawana mapepa aya, tichaenda nawo kudare repamusoro reHigh Court. Tinovimba kuti dare iri richanzwa nyaya yedu, VaMhlanga vobvumidzwa kubvisa mari yechibatiso.”
Vachitaura nevatori venhau mushure mekumira kwaMhlanga pamberi pedare nhasi, munyori mukuru wesangano rinomirira vatori venhau, reZimbabwe Union of Journalists, Perfect Hlongwane, ati kunyimwa mukana kwaMhlanga wekutongwa achibva kumba kureva kuti vatori venhau vese munyika vave panguva yakaoma pavanenge vachiita basa ravo.
VaHlongwani vati, “Ndingapa muenzaniso wekuti kana munhu akabudirwa nemudzimu, wobva wataura zvaunoda, tingashora uyo abudirwa nemudzimu here? Zviri kureva kuti vatori vedu venhau vachashanda vachitya."
Vaenderera mberi vachiti, "Asi isu sesangano, tichaedza kutaurawo nevakuru muhurumende, kuti tionesane kuti inzira dzipi dzingatorwa kuti vatori venhau vashande pasina kumbunyikidzwa.”
Muridzi wekambani yeAlpha Media Holdings, iyo inodhinda mapepanhau anosanganisira NewsDay, The Standard neZimbabwe Independent pamwe neterevhizheni yepadandemutande yeHSTV inove inoshandirwa naMhlanga, VaTrevor Ncube, vapomera mutungamiri wenyika VaEmmerson Mnangagwa mhosva yekushandisa matare zvisizvo zvavanoti zvazoita kuti Mhlanga anyimwe mukana wekubvisa mari yechibatiso.
VaNcube vaudza Studio 7 kuti, “Zvaitika kunaBlessing zvinosuwisa chose."
Vatiwo, "Blessed haana mhosva, nekuti haasiri iye HSTV, uye haasiri iye akataura mashoko arikunzi anogona kukonzeresa kusagadzikana. Zvabuditsa pachena kuti mutungamiri wenyika VaMnangagwa, vakabata matare edzimhosva, nekubatawo kumauto sekureva kwavo.”
Studio 7 yataurawo nemunyori mubazi rezvekubuditswa kwemashoko, VaNick Mangwana, avo vati havana nguva yekuswera vachipindura mashoko asina maturo ataurwa naVaNcube aya.
Vati, “Munoda kuti wese munhu angofamba achihumana, tinofanira kupindura kuhumana ikoko? Ndiko kupera kwemashoko angu ikoku.”
Munyori werimwe sangano revarairidzi reAmalgamated Rural Teachers’ Union of Zimbabwe, ARTUZ, uye vari murwiri wekodzero dzevanhu, VaRobson Chere, vanoti havana kushamiswa nezvabuda mudare nhasi vachiti zvinozivikanwa kuti hurumende yagara inotsondokodza wese ane muono wakasiyana newayo.
VaChere vati, “Kana wakaita seni uchimirira kodzero dzevanhu, ukaita nyaya inopinda mumatare edzimhosva, unongotongwa hako asi mutongo wako unenge uchizivikanwa kare." Vatizve, "Tinochemera kuti dai matare edu edzimhosva amira zvekutoga achiudzirwa zvekuita nevamwe vanhu, asi kuti vatonge mhosva sezvadziri.”
Zvichakadaro, Mhlanga akwanisawo kutura mashoko ari pamusoro pekugariswa kwake mutirongo kubudikidza netsamba yaanyora, iyo yaverengerwa vatori venhau nerimwe remagweta ake, VaDouglas Coltart.
Mutsamba iyi Mhlanga ati acharamba akashinga sezvo ari kusungirwa kuita basa rake. Ati, “Ndadzidza kuti imhosva kuita basa rako nemhazvo."
Vaenderera mberi vachiti, "Ndadzidzawo kuti mutemo hauchengetedzi vasina simba. Asi mukushungurudzika uku, ndinotendawo vose vamira neni. Handisi kuzozorora kusvika ndakunda hondo yandakatarisana nayo, yandinoti ihondo yedu tese.”
Kunyimwa kwaMhlanga mukana wekubvisa mari yechibatiso kwasiya vatori venhau vakawanda vachitya kuti naivowo vangangosungwa pavanenge vachiitawo basa ravo kana vakawanisa mukana vanhu vanotaura zvinogona kugodora hurumende.
Sanezuro, nhasi mapurisa auya zvakare nehuwandu hwawo padare, uyewo vanga vachida kunzwa nyaya iyi vanga vakawandisa zvekuti vamwe vatotadza kupinda mudare.
Forum