Sangano reWafamba Consulting riri muAmerica neMugovera 8 Kurume, riri kubatana nepasi rose mukucherechedza nekupemberera zuva remadzimai regore rino richiita gungano remabiko eInternational Women's Afro Power Brunch.
Vakaumba sangano iri, Muzvare Shingi Mangwiro, vanoti vari kufara kuti gore rino vari kuita mabiko avo pazuva remadzimai chairo uye vanotarisira kuunganidza vanhukadzi vakawanda vanobva kunyika dzakasiyanasiyana.
"Afro Power Brunch, zvichireva kuti madzimai anobva kunyika dzekuAfrica, kuma Caribbean nemuno muAmerica. Tinenge tiine vanenge vachitaura. Tina Akua Asare wekuGhana, Mona-Mae Juwillie chizvarwa cheku Ivory Coast nemuno muAmerica, Sophia Mutamba chizvarwa chekuZimbabwe, Leslie Jefferson ndewe muno muAmerica, Enid-Mai (Jones) anobva kuLiberia, Yeve Chitiga kuZimbabwe naJoyce Hamba wekuZimbabwe. So, madzimai vanenge vaine hunyanzvi vanenge vachitungamirira program yedu vari ivo ma speakers," Muzvare Mangwiro vanotsanangura.
Vanoti vari kupemberawo kuti gore rino sangano ravo rasvitsa makore manomwe richicherechedza nekupemberera zuva revanhukadzi iri.
"Tiri kuona mabiko edu aya ari kuenda achikura gore negore. Eeh, gore rino tine ma speakers edu manomwe. Mamwe makore tinosimboita mashanu or matatu. Zvichiratidza kuti mabiko edu ari kuenda achikura and even vanhu vanouya gore negore vari kuramba vachiwedzera, and tine hurongwa hunenge hunoratidza kuti hunenge huchinakidza."
Muzvare Mangwiro vanoti vatauri vavo inyanzvi mumapoka akasiyana uye vachapa mashoko achange achidzidzisa madzimai zvakawanda zvinosanganisira kuti munhukadzi angazvisimudzira sei? Angazvimiririra sei achimirirawo mhuri yake uye kuzvimiririra kumabasa kwake, nekuzvimiririra pahutano hwake?
Muzvare Mangwiro vanoti munhu wese, zvisineyi kuti munhukadzi here kana kuti munhurume, ari kukokwa kumabiko aya, chero achienda akapfeka mbatya dzeruvara rwemabiko aya, rwunove pink ne purple iyo inove ndiyo ruvara rwe International Women's Day.
"Munhu wese wechidzimai anogona kuuya. Even varume, dzimwe nguva tine vashomashoma vanofara nebasa ratinoita zvokuti imi aKandemiiri munogona kuuya makabatana naMai Kandemiri, eeh, nesutu yenyu ye pink ikoko tinokutambirai nemaoko ese," Muzvare Mangwiro vanotsanangura vachiseka zvavo.
Vanoti mabiko aya achange achiitirwa panzvimbo inonzi Civic Center iri panhamba 1 Veterans Plaza, Silver Spring, mudunhu reMaryland, uye achatanga nenguva dza 10 mangwanani.
Vanoda kupinda vanonzi vanotarisirwa kubhadhara madhora makumi mashanu ($50.00) pamunhu, uye vanenge vachida kutengesa zvinhu imomo vanobhadhara madhora zana nemakumi mashanu ($150.00).
Muzvare Mangwiro vanoti vanenge vachida kuenda kumabiko aya vanowana mafomu ekupindisa padandemutande ravo re info@wafamba.com kana kuvabata panharembozha yavo inoti+1 202 378 6709.
Forum