Munyori anoona nezvemutemo mubato reZanu PF, VaPatrick Chinamasa, vazivisa nezvekudzingwa kubva mubato iri kwenhengo yeCentral Committee vari murwiri wehondo yerusununguko, VaBlessed Geza, avo vari kutungamira kurudziro yekuti mutungamiri wenyika vari mutungamiri weZanu PF, VaEmmerson Mnangagwa vasiye chigaro vachiti vatadza basa.
VaChinamasa vazivisa nezvedanho iri pamusangano wavaita nevatori venhau muHarare, apo vazivisawo zvakare nezvekudzingwa mubato kwedzimwe nhengo dzinoti vanomirira Gutu East muparamende, VaBenjamin Ganyiwa, VaK. Gopo vekuMasvingo naVaGodwin Gomwe nemunin’ina wavo VaGifford Gomwe vekuMashonaland West.
Vamwe vanoti mumiriri weChiredzi North muparamende, VaRoy Bila naVaBrighton Mushekwa, vanove kanzura weWard 12 kuBikita, vanonzi vambomiswa kuve nhengo kwemakore matatu.
Nhengo dzadzingwa nekumbomiswa idzi dziri kupomerwa mhosva yekuzvidza hutungamiri hwemusangano.
Mushandi mukuru muhofisi inoona nezvekuburitswa kwemashoko muZanu PF, VaFarai Marapira, vanoti nhengo dzemusangano dzose dzinozviziva kuti kana dzakakanganisa dzinotorerwa matanho.
“Zanu PF ibato rinofamba riine mutemo. Rine discipline. Kana munhu achinge aonekwa achitsaudzira pane zvinotarisirwa nemusangano. Chimwe chematanho anotorwa ndichochi chekuti munhu anodzingwa, mumwe anobviswa panzvimbo odzoserwa kusero oita card carrying member kwemakore akati. Kune mapanichimendi akasiyanasiyana,” VaMarapira vanotsanangura.
Asi vamwe vari kutevera zviri kuitika mubato riri kutonga iri vanoti vanhu ava vanangwa nekuti ndevamwe vari kupikisana nehurongwa hwekuti VaMnangagwa varambe vachitonga kusvika muna 2030.
Mumwe wenhengo dzadzingwa, VaGodwin Gomwe, vanoti vangoitawo zvekunzwa kuti vadzingwa mubato reZanu PF zvichitevera chisungo chavanoti chakaitwa neCentral Committee neChitatu.
Vanoti vanotambira kudzingwa kwavaitwa uye havasi kuzopikisana nedanho iri. Asi vanoti havana kupiwa mukana wekuzvichenura vasati vatorerwa matanho aya.
“Hapana kuzvichenura nechikonzero chekuti ma recommendation ekunzi inini ndiitwe expelled akaitwa ne province. Right! The same province inana Masimirembwa nanaFundukwa ve disciplinary ndo the same vanhu vakandinyorera prohibition. Ndo the same futi vanhu vakandideedza ku hearing. Handina kuenda ku hearing ne reason yekuti mupurisa andisunga haasiriye anonditonga,” VaGomwe vanotsanangura.
Asi VaMarapira vanoti nhengo dzatorerwa matanho idzi dzakasununguka kutora matanho ekupikisa danho iri dzichitevera gwara remusangano.
Forum