Mapato maviri eMDC neZanu PF, neMuvhuro akanyorerana pasi chibvumirano chekuita hurukuro dzekutsvaga nzira yekupedza gakava rezve matongerwo enyika.
Chibvumirano ichi, Memorandum of Understanding, kana kuti MOU, chakanyoreranwa pakati paVa Morgan Tsvangirai nemumwe wavo, VaArthur Mutambara, vakamirira zvikwata zviviri zveMDC, pamwe naVaRobert Mugabe, mutungamiri weZanu-PF.
Chibvumirano ichi
chichabata nyaya dzakaita semaumbirwo ehurumende itsva, kugadzirisa nyaya
yehupfumi hwenyika, nyaya yeminda, bumbiro idzva remitemo yenyika, zvirango
nezvimwe zvakadaro.
Mutori wenhau weStudio 7, Thomas Chiripasi, uyo ange ari pakunyorerana kwechibvumirano ichi, audza mutori wenhau Blessing Zulu weStudio 7 kuti vakuru vemapato aya vavimbisa kushanda pamwe kuitira kuti vapedze matambudziko akatarisana nenyika.
Mutauriri weMDC inotungamirwa naVaMorgan Tsvangirai, VaNelson Chamisa, vaudzawo mutori wenhau Blessing Zulu kuti rwendo rwuchiri rwurefu kunyange hazvo paumbwa gwara richatevedzwa munhaurirano idzi.
Ukuwo VaGlen Mpani, Regional Coordinator weTransitional Justice Program musangano reThe Center for the Study of Violence and Reconciliation muSouth Africa, vaudza zvakare Blessing Zulu weStudio 7 kuti basa rakawanda riri mberi.
