Mashoko anotevera anotaura pamire hurumende yeAmerica pane zviri kuitika kuMiddle East.
Gurukota rinoona nezvekudyidzana nedzimwe nyika muAmerica VaMike Pompeo vange vari kuMiddle East vanoti pane nyaya mbiri dzakabuda dzakakosha panzendo idzi.
Nyaya yekutanga yakabuda ndeyekuti dzimwe nyika dzemuMiddle East dziri kuda kubatana neIsrael mukuchidyana pasi pechibvumirani chinonzi Abraham Accord. Nyika idzi dzinoti Bahrain, the United Arab Emirates, ne Sudan.
Chimwe chibvumirano chechipiri chakabuda ndechekuti nyika idzi dziri kuwirirana kuti Iran iri kukonzera kusagadzikana mudunhu iri. VaPompeo vanoti zvibvumirano izvi zvakakosha zvikuru kwete kudunhu iri chete asi kutiwo pasi rose.
Vanoti nyika dzakawanda dziri kuvatenda kwese kwavari kufamba nekudyidzana wave kuitwa neUnited Arab Emirates, Bahrain neIsrael.
Vanoti zvibvumirano izvi zvakakosha munyaya dzekudyidzana nebudiriro. VaPompeo vati zvibvumirano izvi iyambiro kuIran kuti zvekuda kuyzviita bhuru mudunhu zvapera vachiti ichasara yave yega isina kana shamwari yepedyo.
Vatiwo kugadzirisa kunetsana pakati peIsrael nePalestine kwakakosha zvikuru mukuunza kugadzikana mudunhu iri. VaPompeo vati zvibvumirano zveAbraham Accord zvakakosha kuunza runyararo, kugadzikana nebudiriro muMiddle East nepasi rose.
Facebook Forum