Zvizvarwa zveZimbabwe zviri muAmerica zvinoti zviri kuronga musangano uri kutarisirwa kuitwa nemusi weChitatu svondo rino muWashington DC.
Musangano uyu ndewekupa mukana zvizvazvarwa zveZimbabwe kuti zvisangane negurukota rezvemari, VaMthuli Ncube, vachipangana navo mazano anoita kuti Zimbabwe ibudirire.
Mumwe wevari kuronga musangano uyu, VaChris Mapondera, vanoti zvinhu zvakakosha kuti vana veZimbabwe vabatsirane kutsvaga nzira dzinoita kuti hupenyu hwevanhu husimukire muZimbabwe.
VaMapondera vanoti muAmerica mune vanhu vanobva kuZimbabwe vane hunyanzvi hwakasiyana siyana hunogona kushandiswa mukubatsira kusimudzira nyika yavo.
Vanotiwo musangano wavo uchapindwa nemunhu wese zvisineyi kuti ndewesangano ripi sezvo chinangwa chemusangano wavo chiri chekuona kuti vanhu vawana mukana wekutaura negurukota ravo vachibvunzawo zvavanoda kunzwinzisisa.
VaNcube vakadomwa segurukota remari gore rapera vachitora basa raiitwa naVaPatrick Chinamasa, avo vava kushanda vari kumuzinda webato riri kutonga reZanu PF.
VaNcube vari kuuya panguva iyo zvinhu zvisina kumira zvakanaka munyika zvichitevera kusungwa kuri kuitwa vanopikisa hurumende vachipomerwa mhosva yekuda kupidigura hurumende yaVaEmmerson Mnangagwa.
Izvi zvinotevera kuratidzira kwemazuva matatu muna Ndira kwakadaidzirwa neZimbabwe Congress of Trade Unions, zvichitevera kukwira kwemitengo yemafuta edzimotokari nezvimwe.
Hurumende inoti mauto akapindira achiedza kubatsira mapurisa kumisa kuratidzira uku, uko kwakazoita mhirizhonga yakasiyana vanhu gumi nevanomwe vafa mushure mekupfurwa nepfuti.
Vamwe vanhu vanodarika makumo manomwe vanonzi vakarapwa maronda akakonzerwa nemabara epfuti.
Facebook Forum