Zviri Kuitika muAmerica
- Marvellous Mhlanga-Nyahuye
Nhoroondo yaVaJoe Biden
Vaimbove mutevedzeri wemutungamiri weAmerica, VaJoe Biden, vebato reDemocratic Party, vari kukwikwidzana nemutungamiri wenyika, VaDonald Trump musarudzo dzichaitwa musi wa3 Mbudzi, vari kukwikwidza kechitatu musarudzo yekuenda kuWhite House, asi rwendo rwuno vari mumiriri weDemocratic Party kekutanga musarudzo yemutungamiri weAmerica.
Kana vakakunda, uye vakagadzwa muna Ndira anotevera, VaBiden vanoita mutungamiri weAmerica wechimakumi mana nematanhatu. Apa vanenge vava nemakore makumi manomwe nemasere ekuberekwa, mutungamiri wekutanga ane makore akadai, vachidarika VaTrump avo vane makore makumi manomwe nemana.
VaBiden vagara vachitaura mumwedzi yose yavange vari kutsvaga rutsigiro kuti vari kutsvaga kupedza hutongi hwaVaTrump.
"Tiri kurwira hunhu hweAmerica," VaBiden vanodaro padandemutande ravo rekutsvaga rutsigiro. "Iyi inguva yekuyeuka kuti tiri vanaani. Tiri vanhu vemuAmerica: Takasimba, uye hatiori moyo, asi tizere neremangwana rakanaka. Ino inguva yekubata munhu wese zvine chiremera. Inguva yekuva nevashandi vanoshandira budiiriro yenyika yose. Inguva yekurwisa kusashandiswa zviri pamwero kwemasimba uko tiri kuona. Inguva yekutarisisa zvakadzama pamwe nekutondera kuti zviuya mberi."
VaBiden vanoshoropodza VaTrump vachiti mutungamiri asina kukodzera munyika ine hutongo hwakasununguka, vachiti "Inguva yehutungamiriri hwunoremekedzwa pasi rose uye hutungamiriri hunokudzwa muno muAmerica."
Panguva iyo pasi rose riri kutatarika nepamusana pedambudziko reCoronavirus, kutsvaga rutsigiro kwaVaBiden mumazuva ekutanga muna Chikunguru, kwanga kusina kufanana nedzimwe sarudzo dzemutungamiri weAmerica mumakore ano. VaBiden vanga vachitsvaga rutsigiro vari pamba pavo mudunhu ravo reDelaware, dzimwe nguva vachimbopinda muguta guru redunhu reDelaware, reWilmington, pamwe neguta riri pedyo, rePhiladelphia mudunhu rePennsylvania, vachitaura pamwe nekuzeya gwara ravo vari muzvikwata zvidiki zvevanhu
VaBiden vakaita musangano mumwe chete chete nevatori venhau mukati memwedzi mitatu sezvo vange vasingade kuita magungano makuru ekutsvaga rutsigiro nekutya kubata kana kubatsira kupararira kwe coronavirus kana vanhu vakawanda vakaungana kuzonzwa vachitaura.
Budiriro neNhoroondo yaVaBiden:
Mushure mekupedza zvidzidzo paUniversity of Delaware neSyracuse Law School, VaBiden, avo vaive nemakore makumi maviri nemapfumbamwe, vakave mugore ra 1972 mumwe wevechidiki kusarudzwa kuve nhengo yedare reSeneti muAmerica. Asi masvondo mashoma vasarudzwa, vakasangana nenjodzi huru. Mudzimai waVaBiden Neilia nemwanasikana wavo aive negore rimwe aberekwa, Naomi, vakafa mutsaona yemotokari panguva yekutanga kweKisimusi. VaBiden vakambofunga kusiya chigaro chavo muSeneti kuitira kuti vachengete vamwe vana vavo vaviri, vose vari vanakomana, asi vakatanga kushandisa chitima zuva nezuva kuenda kubasa kuWashington. Chitima ichi chaitora maminitsi makumi mapfumbamwe kuenda nekudzoka, izvo vakaramba vachiita kwematemo matanhatu vari mudare reSeneti.
Makore akawanda mushure mekufa kwemukadzi wavo wekutanga, VaBiden vakasangana uye vakazoroora muzvare Jill Jacobs Tracy, uyo aida kuve mudzidzisi, uye aine mwanasikana wake akaberekwa muna 1981.
VaBiden vambokwikwidza musarudzo yekutsvaga anomirira bato reDemocratic Party musarudzo yemutungamiri weAmerica muna1987 na2007, asi havana kubudirira.
Mushure mekunge VaBiden vabuda musarudzo yekutsvaga achamirira bato ravo muna 2007, vaivewo mukwikwidzi, VaBarack Obama vakazokumbira VaBiden kuti vave mutevedzeri wavo. Vaviri ava vakakunda musarudzo yemutungamiri weAmerica dmuna 2008, uye vaviri ava vakasarudzwa zvakare muna 2012, izvo zvakapa kuti VaBiden vashande semutevedzeri waVaObama kwemakore masere.
Gwara Rinobata Zviri Kunze kweAmerica:
Vari mudare reSeneti, VaBiden vaive nhengo yekomiti yakakosha yeSeneti inoona nezvekudyidzana vakashanda kaviri sasachigaro wayo. Vari mukomiti iyi, VaBiden vakapikisa hondo yePersian Gulf War muna 1991, asi vakavhotera kuti America ipinde zvichisimba muIraq muna 2003. Vakatsigira kupindira kwemauto emuAmerica pamwe neeNATO muBosnia muna 1994. Vachiri kushanda semutevedzeri waVaObama, VaBiden vakabatsira kuumba gwara reAmerica pane zvaiitika muIraq, kusanganisira kubviswa kwemauto emuAmerica muna 2011. Vakatsigirawo kupindira kwakaita mauto eNATO muLibya muna 2011.
VaBiden vakabata mamwe mabasa akakosha mumakore avo vari muSeneti, kunyanya mukugadzira mabhiri ekurwisa kuparwa kwemhosva, kusanganisira kubhanwa kushandiswa kwezvombo mudzimba kwemakore gumi kusvika 2004 asi mutemo uyu hausati wavandudzwa. Vakatsigira mitemo inoomesera vanopara mhosva dzakaipa, danho ravakati chinjeyi muhurongwa hwavo hwekukwikwidza sarudzo yemutungamiri wenyika gore rino. Iye zvino vanoti "vanhu vakawandisa vari mumajeri muAmerica - uye vazhinji vavo vanhu vatema nevanhu vane ganda rebhurauni."
VaBiden vanoti vanoti vatora mutemo unochengetedza madzimai kuti asashungurudzwe weViolence Against Women Act semutemo wakakosha zvikuru wavakabatsira kuti uvepo uyo vanoti vakabatsira matare maviri emuAmerica kuti udzikwe.
Asi vanoshorwa nemashoko avakataura paiferefetwa nhengo yebato reRepublican Party, uye vari munhu mutema, VaClarence Thomas, avo vainge vadomwa nevaive mutungamiri wenyika, VaGeorge H. W. Bush, kuti vave nhengo yedare Supreme Court mugore ra1991. Vamwe mubato raVaBiden havana kufara nedanho ravakatora, uye nanhasi inyaya inogara yakasimudza mutauro pachitariswa nhoroondo yaVaBiden.
Amai Anita Hill, gweta uye vaishanda naVaThomas, akavapomera mhosva yekuvashungurudza munyaya dzepabonde uye vakapawo huchapupu hwekuva pomera mhosva iyi asi ivo VaThomas vachiiramba. Asi VaBiden, avo vaive sachigaro wekomiti yeSeneti inoona nezvematare nemitemo, havana kubvumidza zvimwe zvapupu zvekutsigira nyaya Hill.
Masangano anorwira kodzero dzemadzimai nevarwiri vekodzero vakatsoropodza kubatwa kwakaitwa nyaya iyi naVaBiden.
Mushure mezvo Seneti yakabvumira kudomwa kwaVaThomas kuva muting wedare reSuoreme Court uye vachiri mudare iri.
Muna Kubvumbi 2019,VaBiden vakafonera Hill vachikumbira ruregerero nemafambisiro avakaita nyaya yake, asi Hill haana anoti ari kugara asina kugutsikana nezvakaitika.
Zvinangwa: Kubudirira kwehutungamiri hwaVaBiden kungangotevedzera makore masere ehutongi hwaVaObama muWhite House, vaine hurongwa negwara rekusimudzira nyaya dzebudiriro pamusoro pemarudzi nezvido zvevanhukadzi muAmerica pamwe nezviga zvepasi rose. Kunyange hazvo VaTrump vakaburitsa America kubva muzvibvumirano zvekutengeserana, zvibvumirano zvezvombo zve nuclear pamwe nekushanduka kwemamiriro ekunze izvo VaBiden vanoti hazvina zvido zveAmerica zvakaitwa naVaTrump, VaBiden vari kutarisirwa kudzosera chimiro cheAmerica pasi rose apmwe nekuona kuti nyika iyi yatanga kutaudzana nedzimwe nyika zvine chiremera.
MuAmerica, VaBiden kwemakore mazhinji apfuura yane nemukurumbira wkushanda nevamwe zvakanaka kunyange vachibva kuRepublicans Party. Asi panguva iyo vange vachirwira kusarudzwa neDemocratic Party, VaBiden vakadududza pavakanzi vaive munhu asina kusimba zvakadzama panyaya dzekuti munhu wese ave nemafungiro ake uye asambunyikidze vamwe vachiti muna pachiitiko muna Kurume, "Ndine nhoroondo isina anoikunda pavanhu vose vari kukwikwidza." VaBiden vakasimbisa nhoroondo yehutongi hwaVaObama, kusanganisira kuwedzera rubatsiro munyaya dzehutano, kutsigira mutemo unobvumidza kuti ngochani dziroorane, uye kutsigira hurumende kuti ibatsire nemari makambani emotokari emuAmerica ainge avhiringwa nekuparara kwehupfumi hwenyika.
VaBiden vanoti VaTrump vasiya hondo yekurwisa dambudziko re coronavirus, vachitiwo "vachamisa kuita dambe rezvematongerwo enyika nekutaura manyepo izvo zvakonzera rusarura nekuita chadzimira mumafungiro evanhu." Va Biden vanoti vachaona kuti "zvisungo zvinobata hutano hweveruzhinji zvichaitwa nenyanzvi dzezvehutano kwete nevezvematongerwo enyika."
Kunyange hazvo kupopota nekubuda furo rehasha padandemutande reTwitter agara ari maitiro aVaTrump kubva pavakapinda muWhite House, kukanganwa nekurasa mukanwa kwaVaBiden kuri kupa VaTrump mukana wekushora VaBiden vachiti munhu asisina pfungwa dzakati tsvikiti nepamusara pekukwegura kwake. Masvondo mashoma apfuura, VaBiden vakati vari kupinda musarudzo yeSeneti, pane kuti vari kupinda musarudzo yemutungamiri wenyika, vakatiwo vanhu zana nemakumi maviri emamiriyoni vafa neCovid-19 pane kuti zana nemakumi maviri ezviuru.
“Kana dai ndakambotaura zvinhu zvakapusa kudai, masangano enhau anonyepa angadai akauya kwandiri achindishoropdza zvakanyanya. Izvi zvinodarika kukanganisa kuri pamwero,” VaTrump vakanyora paTwitter.
Asi VaBiden, pavakabvunzwa kana pfungwa dzavo dzichiri kushanda zvakanaka, vakati, "Tarisa, zvose zvaunofanirwa kuita kungonditarisa uye handife ndakamirira kuenzanisa kugona kwangu kwekuziva nekugona kwemurume wandiri kukwikwidzana naye."
Vaviri ava vari kutarisirwa kusangana vachikakavadzana pasi pechirongwa chekuedzana ruzivo muhurongwa hutatu huchaitwa muna Gunyana naGumiguru.
See all News Updates of the Day
- Jonga Kandemiiri
Mutungamiri weAmerica VaTrump Voyambira Kuti Hurumende Yavo Ichamisa Rubatsiro Rwose kuSouth Africa
Muchikamu chedu chatinotarisa zviri kuitika muAmerica. Mutungamiri weAmerica VaDonald Trump neChishanu chapfuura vakazivisa kuti America ichange ichimisa rubatsiro rwose rwunobva kuhurumende rwuchipiwa kunyika yeSouth Africa.
Vachinyora padandemutande ravo reTruth Social, VaTrump vakati danho iri rine chekuita nemutemo uchangobva kupasiswa nehurumende yeSouth Africa we Expropriation Act, uyo unopa hurumende masimba ekutora minda isiri kushandiswa zvizere.
VaTrump vakakokawo varimi vari kuda kutiza kubva muSouth Africa kuti vapotere muAmerica.
Hurumende yeSouth Africa yagara zvayo iri kuramba mashoko ekuti iri kutorera varimi vechichena minda pamwe nekuvashngurudza.
Nyanzvi mune zvematongerwo enyika vachidzidzisa paTswane University of Technology muSouth Africa, Muzvinafundo Ricky Munyaradzi Mukonza, vanoti mukuona kwavo, nyaya hombe yakasvitsa kuti hurumende yaVaTrump itore danho iri kupesana mune zvamatongerwo enyika kwavepo pakati peSouth Africa neAmerica zvichitevera matanho akatorwa neSouth Africa ekuendesa Israel kumatare muhondo yayo neHamas nenyaya yehondo yeUkraine neRussia.
Muzvinafundo Mukonza vanoti danho rehurumende yeAmerica iri richaomesera varombo vemuSouth Africa zvakanyanya.
- Marvellous Mhlanga-Nyahuye
Gurukota Rinoona nezveKudyidzana neDzimwe Nyika muAmerica VaMarco Rubio Vanoti Chirongwa chePEPFAR Chichaenderera Mberi
Gurukota rinoona nezvekudyidzana nedzimwe nyika muAmerica VaMarco Rubio vati hurumende yeAmerica haisi kuzomira kupa rubatsiro zvachose kunyika dzichiri kubudirira.
Vachitaura nepfenyuro yeSiriusxm nezuro, VaRubio vakati zvirongwa zvakaita sechehomwe yemutungamiri wenyika yeAmerica chekubatsira kurwisa HIV/AIDS kana kuti President’s Emergency Plan For Aids Relief -PEPFAR chabatsira vanhu vanodarika mamiriyoni makumi maviri nemashanu 25 million kubva muna 2003 chichaenderera mberi.
Asi vati vachatanga vaona mashandiro acho nekuona kuti mari dzemitero dzevanhu vemuAmerica hadzisi kushandiswa zvisiri izvo.
Hurumende yeAmerica yakambomira kupa nyika dzichiri kubudirira mari kwemwedzi mitatu ichiongorora zvirongwa zvose zvayanga ichiita.
Kubva muna 2006, Zimbabwe yawana mari inosvika 1,7 billion US dollars kubva kuhomwe yePEPFAR.
Gurukota rezvemari muzvinafundo Mthuli Ncube vakamboudza vatori venhau kumucheto wemusangano weWorld Economic Forum kuDavos, Switzerland kuti pasina mari kubva kuAmerica, Zimbabwe yaizotatarika munyaya dzezvehutano.
Nyanzvi munyaya dzezvehutano, Dr Simbiso Ranga vanoti vanotambira hurungwa hweAmerica hwekuti chirongwa ichi chienderere mberi sezvo change chichi batsira vanhu vakawanda munyika mukurwisa denda reHIV/AIDS.
"Tinotambira nemufaro mashoko aVaRubio sezvo iri shuwiro yedu yekuti chirongwa ichi chidzoswe sezvo chache chichi batsira vazhinji nyanya madzimai kuitira kuti vasatapurire hutachiwona hweHIV/AIDS kuvana vacheche uye nevamwe veruzhinji," Dr Ranga vaudza Studio7.
- Jonga Kandemiiri
Vatungamiri veDzimwe Nyika Pamwe neveZvematongerwo eNyika muAmerica Vosuviswa neKushaya kweVakambove Mutungamiri weAmerica VaJimmy Carter
Vamwe vatungamiri venyika dzepasi rino nevezvematongerwo enyika muAmerica vatambira nekusuva kufa kwevaive mutungamiri wenyika yeAmerica, VaJimmy Carter, avo vakatungamira nhaurirano dzerunyararo pakati peIsrael neEgypt vakazopiwa mubairo weNobel Peace Prize nebasa ravakaita rekubatsira vanotambura. VaCarter vakashaya neSvondo vave nemakore zana.
Mutungamiri weAmerica, VaJoe Biden nemudzimai wavo, Amai Jill Biden, vati, “Nhasi, America nepasi rose zvarasikirwa nekutungamiri anoshamisa, mutungamiri ane hunyanzvi uye anobatsira vanotambura.mumakore anodarika makumi matanhatu tanga tiine ruremekedzo rwekushevedza Jimmy Carter se shamwari yepamwoyo. Asi zvinoshamisa pamusoro paJimmy Carter, zvichakadaro, ndezvekuti mamiriyoni evanhu America yose nepasi rose vasina kumbobvira vasangana naye vanofunga nezvake seshamwari yepamwoyo zvakare.”
Vakamirira kugadzwa semutungamiri wenyika, VaDonald Trump vati, “Zvimhingamipinyi zvakasanganikwa nazvo naJimmy semutungamiri wenyika zvakauya panguva yakakosha kunyika yedu iye akaita zvose zvaaikwanisa kuvandudza hupenyu hwezvizvarwa zveAmerica. Nekuda kwaizvozvo, tose tine chikwereti chekumutenda. Melania neni tiri kufunga zvakadzama nezvemhuri yekwaCarter nevadikani vavo munguva ino yakaoma kudai. Tinokurudziramunhu wese kuti ange ainavo mumwoyo nemuminamato.”
Vaimbove mutungamiri wenyika VaBarack Obama vati, “Akasarudzwa mumumvuri weWatergate, Jimmy Carter akavimbisa vavhoti kuti anogara achitaura chokwadi. Uye akadaro - achirwira kuti zvinakire veruzhinji, mhedzisiro inoshurikidzwa. Aifunga kuti zvimwe zvinhu zvakakosha kupfuura kusarudzwa zvakare- zvinhu zvakaita sekuvimbika, rukudzo, uye tsitsi. Nekuti Jimmy Carter aitenda, zvakadzama sokudavira kwaaiita chero chinhu, kuti tese takasikwa nemufananidzo waMwari. ...
Maranatha Baptist Church ichange yakanyarara zvishoma neSvondo, asi Mutungamiri Carter havangambove kure - vakavigwa padivi paRosalynn padivi pemuti wemu willow kuzasi kwenzira, ndangariro yavo ichidaidza tese kuti titeerere ngirozi dzedu dziri nani. Michelle neni tinotumira ndangariro dzedu neminamato kumhuri yekwaCarter, uye nemunhu wese aida nekudzidza kubva kumurume anoshamisa uyu.”
Vaimbove mutungamiri wenyika, VaGeorge W. Bush vati, “Laura neni tinotumira mashoko edu enyaradzo anobva mumwoyo yedu kuna Jack, Chip, Jeff, Amy, uye nemhuri yese yeCarter. James Earl Carter, Jr., akanga ari murume ane kutenda kwakadzama. Akanga akavimbika kumhuri yake, munharaunda yake, uye kunyika yake. Mutungamiri Carter vakaremekedza hofisi. Uye kuedza kwake kusiya nyika iri nani hakuna kupera nehutungamiriri. Basa rake neHabitat for Humanity neCarter Center rakaisa muenzaniso webasa richakurudzira vanhu vemuAmerica nezvizvarwa zvakawanda zvichatevera.
Vaimbove mutungamiri weAmerica VaBill Clinton nevaimbova gurukota rezvekudyidzana nedzimwe nyika muAmerica, Amai Hillary Clinton, vati, "Kubva pakuzvipira kwake kukodzero dzevanhu seseneta wedunhu uye gavhuna weGeorgia; kuenda mukuedza kwake semutungamiri kuchengetedza zviwanikwa zvedu muArctic National Wildlife Refuge, mukuita kuti kuchengetedzwa kwemhando dzemoto kuve chinhu chinokosha munyika, kudzorera Panama Canal kuPanama, uye kuwana runyararo pakati peEgypt neIsrael kuCamp David; kuenda kumabasa aakaita kuCarter Center asisiri mutungamiri wenyika achitsigira sarudzo dzechokwadi, kusimudzira runyararo, kudzivirira zvirwere, nekusimudzira hutongo hwejekerere; kuenda kunyaya yekuzvipira nekushanda zvakasimba kwake naRosalynn kusangano reHabitat for Humanity -- akashanda zvakasimba kuti kuve nepasi rose riri nani, rakanaka."
Mutungamiri weFrance VaEmmanuel Macron, "Muhupenyu hwake hwose, Jimmy Carter aive ari mutsigiri akasimba wekodzero dzevanonyanya kubatirirwa uye akarwira runyararo zvakasimba. France inotumira mashoko ayo ekumurangarira kumhuri yake nekuvanhu veAmerica."
Mutevedzeri wemutungamiri weAmerica Amai Kamala Harris vati, "Muhupenyu hwavo hwese, Mutungamiri Carter vakasimbiswa nerudo nerutsigiro rwemudiwa wavo wemakore makumi manomwe nemanomwe, Mudzimai Wekutanga Rosalynn Carter, vane hupenyu hwatakave nemukana wekupemberera Mutungamiri VaBiden neni kuGeorgia gore rapfuura. Mushure mekusiya chigaro, Mutungamiri Carter vakaenderera mberi nekurwira runyararo, hutongo hwejekerere, uye kuchengetedza chiremerera chevanhu kuburikidza neCarter Center.
Ndakava nemukana wekuziva Mutungamiri Carter kwemakore. Ndichagara ndichirangarira mutsa wavo, uchenjeri hwavo, uye nyasha dzavo dzakadzama. Hupenyu hwavo uye nhaka yavo zvinoramba zvichindikurudzira - uye zvichakurudzira zvizvarwa zvichauya. Nyika yedu inzvimbo irinani nekuda kweMutungamiri Carter. "
Vakamirira kugadzwa semutevedzeri wemutungamiri VaJD Vance vati, "Jimmy Carter akazvipira hupenyu hwake kushandira nyika ino. Pfungwa neminamato yedu inoenda kune vaanoda. Ndinoti arare murunyararo."
Mutungamiri wehurumende yeBritain, VaKeir Starmer vati, "Ndanzwa urombo kunzwa nezvekufa kweMutungamiri Carter uye ndinoda kupa ruremekedzo kumakumi emakore ekuzvipira kushandirwa veruzhinji.
"Hutungamiri hwake huchayeukwa nekuda kwezvibvumirano zvine nhoroondo zvakasainiriranwa kuCamp David zve Camp David Accords pakati peIsrael neEgypt, uye kwaive kuzvipira kweupenyu hwese kurunyararo kwakamuona achiwana mubairo weNobel Peace. Vachikurudzirwa nekutenda kwavo kwakasimba uye hunhu, Mutungamiri Carter vakashanda zvakasimba vasiya chigaro chemutungamiri wenyika mukurwira magariro akanaka nekodzero dzevanhu munyika nekune dzimwe nyika. "
Vamwe vapa mashoko ekunyaradza vanosanganisira nhengo dzeparamende muAmerica Seneta Mitch McConnell, mutauriri wedare reparamende VaMike Johnson nenhengo yeparamende VaMike Turner nevamwe.
(Nyaya yandakupai yabva kuReuters.)
- Marvellous Mhlanga-Nyahuye
Vakamirira Kugadzwa seMutungamiri weAmerica VaTrump Voti Vachange Vachikoshesa Kushandiswa kweArtificial Intelligence
Vakamirira kugadzwa semutungamiri wenyika muAmerica, VaDonald Trump, vanoti vachange vachikoshesa kushandiswa kwe Artificial Intelligence kana kuti AI pavachapinda pachigaro mwedzi unouya.
Izvi zvinonzi nedzimwe nyanzvi mune zvehupfumi zvinobatsira America mumakwikwi ayo neChina munyaya dzekushandiswa kwemichina yechizvinozvino pamwe nemadandemutande.
VaTrump vari kutarisirwa kugadzwa semutungamiri wenyika musi wa20 mwedzi unouya.
Muwongorori wenyaya dzezvematongerwo enyika uye vachishanda nesangano reConcerned Citizens, VaTim Muringai, vanoti danho riri kuda kutorwa naVaTrump rakanaka sezvo richizogona kubatsira munyaya dzezvehupfumi hwenyika yeAmerica.
"Zvakakosha kuti nyika yeAmerica ifambirane nezviri kuitwa nedzimwe nyika dzakabudirira panyaya yekushandisa Artificial Intelligence," VaMuringai vaudza Studio7.
- Marvellous Mhlanga-Nyahuye
Vakamirira Kugadzwa seMutungamiri weAmerica VaTrump Vonzi Vangangoburits America muWorld Health Organisation
Chikwata chiri kutungamira hurongwa hwekupinda muhofisi kwevakamirira kugadzwa semutungamiri weAmerica VaDonald Trump, chinonzi chiri mushishi kugadzira hwaro hwekuti nyika yeAmerica ibude musangano reWorld Health Organisation pavanongopinda muhofisi.
Sangano renhau reReuters rinoti izvi rakazvinzwa kubva kune imwe nyanzvi yezvemitemo yezvehutano iye ruzivo nezvenyaya iyi.
Bepanhau reFinancial Times rinonzi ndiro rakatanga kuburitsa nyaya iyi richiti rakanzwa kubva kuvanhu vaviri vane ruzivo nezviri kuitika.
Chikwata chaVaTrump chiri kuita gadziriro yavo yekupinda muhofisi chinonzi changa chisati chapindura mibvunzo yatumirwa nesangano reReuters pamusoro penyaya iyi.
Nyanzvi munyaya dzezvehutano uye vari chiremba vanoshanda vari kuNorth Carolina muAmerica, Doctor Simbiso Ranga, vanoti kana chiri chokwadi kuti VaTrump vari kuda kuti America ibude musangano reWHO, nyaya yehutano pasi rose inogona kuzokanganisika sezvo mari zhinji inoshandiswa muzvirongwa zvinokokerwa nesangano iri ichibva kuAmerica.
"Shuwiro yedu ndeyekuti zvinhu zvisashanduke mumasangano akadayi seWorld Health Organisation sezvo achibatsira zvikurusa nyika dzakadayi seZimbabwe munyanya yekupa mari kuzvirongwa zvinobatsira panyaya yekuchengetedzwa kwehutano," Dr Ranga vaudza Studio7.
Facebook Forum