Nhengo dzeJohane Masowe weChishanu dziri kuita mashiripiti mumusha weNorton ekubatsira vanorwara nepfungwa.
Svondo rapera, Studio7 yakaburitsa nyaya yevarume gumi vekuKadoma vanorwara nepfungwa vakanga vatorwa nemapositori aya, asi hama dzavo dzichiti dzainge dzisati dzanzwa kuti varume ava vari kupi mushure memwedzi mitatu. Mumwe muteereri weStudio7 ari kuBotswana akatiudza kuti tiende kuchiteshi chezvitima muNorton.
Vanodarika nepaimbokwirirwa zvitima muguta diki reNorton vari kukatyamadzwa nemashiripiti ari kuitwa nevesvondo yeJohane Masowe weChishanu avo vari kubatsira vanorwara nepfungwa.
Chiri kunyanyoshamisa ndechekuti vesvondo iyi vari kubatsira vanorwara ava avo vanozivikanwa zvikuru munzvimbo dzavanobva kuti vanga vachirwara nepfungwa kwenguva refu.
Asi mushure mekubatsirwa nemapositori aya, vaisimborwara nepfungwa ava vanoti vava kuita zviri nani.
Studio7 yakashanyira nzvimbo iyi apo yakaona vanorwara nepfungwa vanosvika makumi matatu vari kubatsirwa. Mumwe wevanhu vaibatsirwa ava, Va Patrick Maphosa, vanoti vave kuita zviri nani.
Mumwe wevari kubatsira vanorwara nepfungwa ava, Madzibaba Silog Sogeriki, vanoti vakatumwa nemweya mutsvene kuti vabatsire vari kutambura ava.
Madzibaba Sogeriki vanoti vanobatsira pachena uyezve havatenderi vanhu vanouya nezvipo zvemari kana zvimwe zvakadaro kunze kwezvekudya zvevari kushandirwa.
Mumwe wevakabatsirwa akadzorerwa kumba kwavo, ndi VaSitefani Songo wekuKadoma, avo vave kumba kwavo muRimuka mushure mekupedza mwedzi mitatu achinamatirwa ari muNorton.
Svondo rapera Studio7 yakaburitsa nyaya yaVaSitefani Songo, avo vainzi nebaba vavo vainge vasiri kuziva kwavari mushure mekutorwa nemapositori.
Studio7 yakatevera VaSitefani Songo kuKadoma, uko baba vavo, VaMalvias Songo, vari kufara zvikuru nesanduko yaitwa nemwana wavo mushure mekubatsirwa nevekwaJohane Masowe weChisanhu ava.
VaSongo vanoti maitiro emwana wavo asanduka zvikuru kubvira adzoka mushure memwedzi mitatu ari kuNorton uko aibatsirwa.
Asi vamwe varume vapfumbamwe vakatorwa kuKadoma vachiri muNorton, sezvo hama dzavo dzisati dzauya kuzovatora. Madzibaba Ephraim vanoti vari kuomerwa nemari yekufambisa yekuti vanenge vabatsirwa ava vadzoserwe kuhama dzavo.
Madzibaba Sogeriki vanotiwo kubatsira kwavo kunotora nguva yakasiyana siyana zvichienderana nekuti chirwere chemunhu wacho chinenge chakamira sei.
Madzibaba Sogeriki vanoti vanoshandisa mafuta kana mvura yakanamatirwa pamwe neminamato mukubatsira kwavo.
Madzibaba Sogeriki vanoti vari kuedza kubatsira vanhu vanobva kumativi mana ese enyika vachiti ivo vari kukokorodza vanhu kubva kumaguta akasiyana siyana.
Ikozvino Madzibaba Sogeriki vanoti vatarisana nekuenda kuMatabeleland pamwe nekuManicaland.
Madzibaba Sogeriki vanoti vanonyoresa nemapurisa vese vavanenge vakokorodza kuitira kuti hama dzavo kana dzoda kuvatevera, zviite nyore.