Kunetsana pakati pezvizvarwa zveZimbabwe nezveBotswana kumuganu wenyika mbiri kuri kuenderera mberi paine kurudziro yekuti paitwe nhaurirano nevatungamiri vehurumende venyika mbiri idzi kuti nyaya yekubiwa kwemombe nezvinofungidzirwa kuti zvizvarwa zveZimbabwe isarambe ichienderera mberi.
Kurudziro iyi yakaitwa nemusi weSvondo nasachigaro wekomiti yeparamende inoona nezvemabasa nemukati menyika muBotswana VaCaterpillar Hikuama mushure mekuita musangano nevagari wemisha yeJackalas 1, Jackalas 2, Butale, Moroka neRamokgwebana iyo yatarisana nedambudziko rekubirwa mombe.
VaHikuama vakaudza Studio7 kuti paita ropa rakaipa pakati pezvizvarwa zveZimbabwe neBotswana zvinogona kuzokonzera kurwisana.
Vakurudzira zvizvarwa zveZimbabwe kuti zvimire kushandisa nzira dzemusango pakupinda nekubuda munyika iyi vachiti vamwe vari kuzopomerwa mhosva dzekuba zvipfuyo nekuda kwekuti havana magwaro ekufambisa.
Mumiri wenzvimbo yeBobonong mudare reparamende, VaTaolo Lucas vanoti vanopfuya mombe vane makore anodarika makumi mana vachingobirwa nevanofungidzirwa kuti zvizvarwa zveZimbabwe izvo zvoita kuti vamwe vaise mutemo mumaoko.
Vaimbove mumiriri weBotswana muZimbabwe, VaKenny Kapinga, avo vave mumiriri weOkavango mudare reparamende muBotswana uye vari nhengo yekomiti iyi vakaudza Studio7 kuti Zimbabwe yakafanira kuedza nepainogona kugadzirisa hupfumi wenyika kuitira kuti zvizvarwa zvavo zvisangopembera nenyika nokuda kwenzara.
Nyanzvi munyaya dzekodzero dzevanhu uye vari mudzidzisi wemutemo paUniversity of Botswana, VaTimothy Muchadehama vanoti nzara yapfunya chisero munyika nokuda kwekushaikwa kwemabasa ndiyo yoita kuti zvimwe zvizvarwa zveZimbabwe zvirarame nekuita zvehumbavha.
Studio7 haina kunzwa divi rehurumende panyaya iyi sezvo gurukota rinoona nezvekudzivirirwa kwenyika, Amai Oppah Muchinguri-Kashiri vati vange vari mumusangano.
Mutauiriri wemapurisa Assistant Commissioner Paul Nyathi vaudza Studio 7 kuti vange vari mumusangano vasingakwanisewo kupa divi ravo. Asi mutungamiri wenyika VaEmmerson Mnangagwa vakaumba chikwata chemakurukota kuongorora nyaya iyi.
Bepanhau reChronicle rinoti mapurisa akakwanisa kuwana mombe dzakabiwa dzimwe kubva kuBotswana kunzvimbo dzekuMatabeleland dzinotiTshanyaungwe. Makhado, West Nicholson, John Dip, Collen Bawn nedzimwe. Gurukota rezvekurima VaAnxious Masuku vanoti VaMnangagwa vari kunetseka zvikuru nekubiwa kwezvipfuyo uku.
Facebook Forum