Kutengeswa kwefodya kwemwaka wa2010, kwatanga muHarare neChipiri, fodya ichitengeswa nemitengo yakakwirira kudarika yegore gore rapfuura. Pamisika miviri yefodya Tobacco Sales Floor pamwe nekuZimbabwe Industry Tobacco Auction Company, pange paine vatengi vanobva kunyika dzakaita seAmerica neRussia.
Mukuru weZimbabwe Industry Tobacco Auction Company, VaAndrew Matibiri, vanoti mabhero mazana masere efodya atengeswa neMuvhuro uye kirogiramu yefodya yanga ichitengwa nemadhora mana ekuAmerica. Fodya yegire rino iri kutarisirwa kutengeswa nemari inosvika kana kudarika mazana matatu emamiriyoni emadhora eku America.
Huwandu uhu chidimbu chemari yaibva mukurima fodya chirongwa chekutorera varungu mapurazi avo chisati chatanga. Zimbabwe yaiwana mari inodarika mazana matanhatu emamiriyoni emadhora ekuAmerica.
Imwe nyanzvi munyaya dzekurima inoti zvinhu hazvina kumira zvakanaka munyaya dzekurima fodya, kunyange hazvo zviri nani pane gore rapera.
VaRenson Gasela ndivo munyori anoona nezvekurima mu MDC inotungamirwa naVa Arthur Mutambara. VaGasela vanoti zvichatora nguva yakareba kuti Zimbabwe idzokere payakanga iri munyaya dzekurima fodya, sezvo varimi vatsva vakapihwa minda, vasati vava neruzivo rwakakwana.
