Sangano rakazvimiririra richiongorora mashandiro anoitwa muparamende, reParliamentary Monitoring Trust, rinoti makurukota mazhinji anozvidza paramende uye havasi kuita basa ravo nemazvo.
Imwe nhengo yesangano iri uye vachiita dhigirii re PhD paUniversity of Free State, VaSibanengi Ncube, vanoti zvakagara zvichionekwa kubva makore apfuura kuti makurukota ehurumende anozvitora sevari pamusoro penhengo dzeparamende.
VaNcube vanoti kunyange hazvo nguva yakapiwa makurukota kuti auyise mabhiri makumi maviri nemapfumbamwe kuparamende iri shoma, VaMnangagwa nemutauri wedare reparamende, VaJacob Mudenda, vakazviona kuti makurukota haasi kuita basa nemazvo uye makurukota aya anofanira kuudzwa kuti vashande nesimba, vachiuya kuparamende kuzobvunzwa nekupindura mibvunzo pamusoro pezvemapazi ehurumende avanotungamiririra.
Pasi pevaive mutungamiri wenyika VaRobert Mugabe, makurukota aiita madiro aJojina vasingaende kudare reparamende. VaMnangagwa vange vati izvi zvinofanira kumira.
Facebook Forum