Mapurisa anonzi akanga akapakatira zvombo anodarika makumi maviri, anonzi akarambidza mubati wehomwe muMDC inotungamirirwa naVaMorgan Tsvangirai, VaRoy Bennett, kupinda papurazi ravo manheru eChishanu chapfuura.
VaBennett vakatorerwa purazi reCharleswood Estate, nehurumende muna 2004. VaBennett vanoti vaida kuti vatore midziyo yavo inosanganisira dota rababa vavo.
VaBennett vanoti mapurisa aya airatidza kudhakwa, uye akavashungurudza zvikuru pamwe nemudzimai vavo, Amai Heather Bennett. VaBennett vanoti vakanga vapiwa mvumo neArda yekuti vakwanise kutora midziyo yavo papurazi ravakadzingwa makore matanhatu adarika.
Studio7 haina kukwanisa kunzwa divi remapurisa. Asi VaBennett vanoti zvinhu zvinorwadza kuti mapurisa anofanirwa kuchengetedza kodzero dzevanhu, ndivo aivashungurudza.
