Nhengo dzeZinasu nhatu dzasungwa neChitatu kuUniversity of Zimbabwe, mushure mekuita musangano nevadzidzi vepachikoro ichi.
Nhengo idzi dziri kupomerwa mhosva yekuda kufurira vadzidzi kuti vaite mhirizhonga.
Vatatu ava vanosanganisira mutungamiri weZinasu, VaTafadzwa Mugwadi, vakafanobata chigaro chemunyori mukuru musangano iri, VaTerrence Makoneke, pamwe nemunyori we research, VaNoel Gotora.
Vasungwa ava vaendeswa kuAvondale Police Station, uye vari kutarisirwa kurara vari muhusungwa.
Studio7 haina kukwanisa kunzwa divi remapurisa. Asi mutauriri weZinasu, VaKudakwashe Chakabva, vanoti vasungwa ava havana mhosva yavapara.
