Vagari vekuMasvingo vanoti havasi kufara nedanho rakatorwa nekanzuru yavo rekutambisa mari dzavanobhadhara apo yakaenda kunoshambdza mabasa ayo kuZimbabbwe International Trade Fair kuBulawayo.
Vagari ava vanoti hazvina musoro kuti kanzuru iende kuZITF kundoshambdza basa rayo ikoko nekuti mari zhinji inobva kuvagari veMasvingo avo vasina kuendako. Vagari ava vanoti hapana mari inowanikwa nekanzuru kubudikidza nekuzvishambadza kuZITF.
Kanzuru, iyo yakaenda kuZITF kwesvondo rose, inonzi yakabudisa mari yakawanda sezvo kwakaenda vashandi vakawanda pamwe nemakanzura eguta rose avo vari kugarako.
Vazhinji vanoti bhizimusi rekanzuru guru rinobva mukubhadhrwa kwemari dzemitero nevagari nekudaro hapana chainoda chakakura kuBulawayo uko vanoti vakaenda kunodya mari vari kuzororo.
Mugari weku Rhodene, Amai Eashter Nyambiya, vanoti kanzuru iri kutambisa mari kuenda kuBulawayo nekuti hakuna vagari vemuMasvingo vanoda kushambadzirwa basa kuti kanzuru iwane mari.
Kanzuru inonzi yakaendesa vashandi vanopfuura makumi maviri pamwe nemakanzura ose ari gumi kuBuluawayo, uko vanhu ava vanopihwa mari dzekubatsirikana dzinosvika chiuru chemadhora emaRTGS pamunhu mumwe chete, zvichireva kuti kanzuru yakabudisa mari inopfuura zviuru makumi matatu emadhora semari yekubatsirikana
Pamusoro pezvo, kanzuru inozobhadharira vanhu vayo vose mari dzekugara muhotera kwemazuva mashanu inopfuura zana remadhora pazuva roga roga, iyo inozopfuura zviuru makumi maviri zvemadhora, isati yabhadhra mari dzesitendi nekushambadza mu ZITF.
Mari yose inoshandiswa nekanzuru svondo rose inogona kusvika zviuru zana zvemadhora
Vamwe vagari vakaita saVa Hardlife VaMapingure vanoti mari yakashandiswa kuBulawayo yaigonawo kutenga mafuta emotokari dzemarara kwemwedzi mitanhatu.
Asi meya weguta reMasvingo, VaCollen Maboke, vaudza Studio7 parunhare kuti kundoshambadza mabasa avo ku Trade Fair kunobatsira kutsvaga vemabhizimusi vanogona kuzouya kuitira mabasa avo mudhorobha reMasvingo.
Asi vamwe vagari vakaita sa VaNkulumani Mulambo, vanoti Trade Fair haisiyo nzvimbo yekutsvaga vanoinvesita mudhorobha kanzuru ichishandisa mari yakawanda kuti izvi zviitike.
Vamwewo vanoti mari yakashandiswa kuZITF inogona kushandiswa kutenga mishonga yekuchenesa mvura kwemwedzi mitatu kuitira kuti vanhu vanwe mvura yakachena.
Mukuru wemabasa musangano reVagari,reMasvingo United Residents and Rate Payers Alliance(MURRA) VaAnoziva Muguti, vanoti uku kutambiswa kwemari inofanira kushandiswaa pazvinhu zvakakosha.
Vagari vanoti Kanzuru inofanira kushambadza mabasa ayo panoitwa showo ye Masvingo muna Nyamvhuvhu sezvo vagari vazhinji vachikwanisa kupinda mushowo iyi vachionawo zvavanoshambadza.
Facebook Forum