MDC Alliance inoti iri kuruka nyaya yakasimba yekusvitsa mudare ichipikisa zvakaburitswa neZimbabwe Electoral Commission, Zec, zvekuti mutungamiri weZanu PF, uye vari mutungamiri wenyika, Va Emmerson Mnangagwa, ndivo vakakunda musarudzo yemutungamiri wenyika.
Chipangamazano uye vari mutauriri wemutungamiri weMDC Alliance, VaNelson Chamisa, Doctor Nkululeko Sibanda, vanoti hurongwa hwekuenda kumatare huri mugwara sezvo vachifanirwa kuita izvi musi weChina usati wapfuura.
VaSibanda vati sezvo paine vanhu vari kuedza kuvhiringa hurongwa hweMDC Alliance, havasi kukwanisa kubuda pachena kuti magwaro ekupikisa zvakaburitswa nasachigaro weZec, Amai Priscilla Chigumba, achasvitswa riini kumatare.
Vati izvi zvinogona kuburitswa nemagweta eMDC Alliance paachaita musangano nevatori venhau neChitatu mangwanani.
Vachipindura kuti seyi MDC Alliance iri kunonoka kuisa mapepa ayo kumatare, VaSibanda vati zvose zvavari kuita zviri kuitwa pamutemo, uye vanhu vari kubvunza mibvunzo yekuti seyi vari kunonoka vanhu veZanu PF nekuti vatsigiri vose veMDC Alliance vari kuziva zviri kuitika.
Facebook Forum