MDC Alliance inoti nemusi weChipiri iri kuzopinda mumigwagwa yemuHarare ichiratidzira kusafara kwayo nemafambisirwo ari kuitwa sarudzo nesangano reZimbabwe Electoral Commission iro riri kuti riri kuzorwa mafuta enguruve yarisina kudya.
Uku kuratidzira kwekutanga kukuru munyika kubva zvabviswa pachigaro vaimbove mutungamiri wenyika VaRobert Mugabe.
Mukuru wemapurisa mudunhu reHarare kana kuti Officer Commanding Harare Province Chief Superintendent Ncube vanyorera tsamba kumunyori mukuru weMDC-T VaDouglas Mwonzora e vachibvumidza MDC Alliance kuratidzira asi vachisimbisa kuti ikatyora mutemo vachatora matanho akakodzera pamutemo. Vati kufora uku kunofanira kutora migwagwa yavatara.
Vanoona nezvekurongwa kwemusangano muMDC-T inotungamirirwa naVaNelson Chamisa, VaAmos Chibaya, vaudza vatori venhau kuti vakaita zvese zvinodiwa pamutem.
VaChibaya vati MDC Alliance inoda kuziva kuchadhindwa mapepa ekuvhotera uyewo inodawo kuvevo nhengo dzekomiti yeZEC inoona nezvekufambiswa kwesarudzo yeNational Logistics Committee.
ZEC yakatoendeswa kumatare zvekare nesangano reElection Resource Centre nenyaya yegwaro revavhoti.
Asi sachigaro wesangano iri Amai Priscilla Chigumba vaudza bepanhau reHerald kuti vari kuita zvose zvinodiwa pamutemo mukuitwa kwesarudzo. Sachigaro weZimbabwe Election Support Network VaAndrew Makoni vanoti pane zvimwe zvinoda kugadziriswa.
Mukuru weZimbabwe Democracy Institute Doctor Pedzisayi Ruhanya vaudza Studio 7 kuti zvichemo zveMDC Alliance zvakanaka nekuti kana zvikagadziriswa sarudzo dzinoitwa pachena.
Mukuru wePlatform for Youth Development, VaClaris Madhuku, vaudza Studio 7 kuti MDC Alliance ingadai yakatanga kuratidzira kare.
Kuratidzira uku ndekweukutanga kuitwa nevanopikisa kubva zvabviswa VaMugabe pachigaro. Vamwe vanoti vakamirira kuona kuti pane zvachinja here pasi pehutongo hwaVaMnangagwa.
Asi nyanzvi munyaya dzezvematongerwo enyika Doctor Victor Chimhutu vanoti vanhu havafanire havo kunyanyoisa chivimbo pamapurisa kuti achinja.
Zvichakadai mamwe mapato anopikisa anoti haasi kuzobatana neMDC Alliance mangwana achiti haana kukokwa.
Sachigaro weCoalition of Democrats kana kuti CODE, VaElton Mangoma vaudza Studio 7 kuti kunyange zvichemo zveMDC Alliance zvakanaka vanoona sekuti vangadai vakazvivandudza kusanganisira nyaya yekuti vanhu vanovhotesa vachadomwa sei sezvo musarudzo dzapfuura nhengo dzeZanu PF nevasori vaivhotesa.
Pataenda pamhepo hatina kunge tanzwa kuti vePeople’s Rainbow Coalition vachabatana neMDC Alliance here asi vamwe vakuru vakuru mubato reNational People Party vaudza Studio 7 kuti vange vasina kukokwa mukuratidzira uku.
Mutungamiri weMDC Alliance VaNelson Chamisa vachazotaura nevatsigiri vavo muAfrica Unity Square kana dzapedza kusiya magwaro adzo enyunyuko kuZEC nekumutungamiriri wenyika.
Facebook Forum