Mutungamiri wenyika, VaRobert Mugabe, vanonzi mushure mekutaura nevamwe vavo muZanu-PF, vakaramba kupa mutevedzeri wemutungamiri we MDC-M, VaGibson Sibanda, ruremekedzo rwegamba. Izvi zvakonzera kusawirirana kukuru muhurumende yemubatanidzwa.
VaSibanda vakashaya pakati pehusiku hweMuvhuro kuMater Dei Hospital muBulawayo mushure mekurwara nechirwere chegomarara kwenguva yakareba.
Mutungamiri wehurumende, VaMorgan Tsvangirai, pamwe nemutevedzeri wemutungamiri wehurumende, VaArthur Mutambara, vakabatana mukunyora tsamba kuna VaMugabe vachiti VaSibanda vapihwe ruremekedzo rwegamba.
Asi VaMugabe nevamwe vavo vakaramba kutambira chikumbiro ichi vakati mhuri yaVaSibanda ichabatsirwa chete nemari yekuviga mufi.
VaSibanda vakashaya vari muhurumende vachishanda sachipangamazano mubazi rezvekupodzwa kwemaronda nekuregererana. Mufi anonzi ari kutarisira kuradzikwa neSvondo mumusha wekwaSilalatshani pedyo neFilabusi mudunhu reInsiza kuMatabeleland South.
VaMutambara vati kuita kwaVaMugabe kunoodza moyo uye kunovapa shungu dzekuti vafambire mberi nehurongwa hwekuti pave nekomiti isina bato rayakarerekera inodoma magamba.
Nyanzvi munyaya dzezvematongerwo enyika uye vari Executive Director ve Africa Reform Institutte, VaTrevor Maisiri, vanoti veMDC vanofanira kudzokera kuvanhu kuti vaone kuti voita sei naVaMugabe.
