Veruzhinji vari kuchema chema zvikuru nekukwira kwemitengo yezvinhu inonzi yakwira zvakanyanya kubva payanga iri mumazuva ehurumende ya va Robert Mugabe.
Vataura ne Studio7 vati saga refotireza ravaitenga madhora makumi matatu, nhasi vave kuritenga madhora makumi matanhatu.
Vanoti shangu dzevana vechikoro dzavaitenga madhora makumi maviri, vave kudzitenga nemadhora makumi masere. Vanhu ava vanoti zvinhu zvese zvakwira mitengo uye hupenyu hwaomera vanhu zvisineyi nekuti unoenda kubasa kana kuti kwete.
Muzvare Portia Katiyo, avo vari ku Kadoma, vanotiwo zvinhu hazvina kumira zvakanaka munyika zvekuti hupenyu hwava kuvaomera.
Izvi zviri kuitika panguva iyo vana chiremba vari kuramwa mabasa uye varairidzi vachiti vachaenda kubasa mazuva maviri chete pasvondo nekuda kwekuomerwa nehupenyu.
Munyika muri kutaridza kuti hamuna kugadzikana nekuda kwekunetseka kuri kuita vanhu.
NeMuvhuro vashandi vemumigodhi vaitiwo vave kuda kubatana nevarairidzi, navana chiremba mukukanda mapadza pasi.
Vezvitoro vanonzi vave kutiwo vanoda mari dzekunze kwete kutambiriswa bond notes izvo zviri kuita kuti veruzhinji vatambure zvakanyanya.
Facebook Forum