Chikwata cheCaps United chinoti chichiri kure nekutora mukombe weCastle Lager Premier Soccer League kunyange hazvo chakatungamira kwasara mitambo miviri kuti makundano emwaka uno asvike kwamvura yacheka makumbo.
Caps United yakasimbisa hutungamiri hwayo mushure mekurova Dynamos 1-0 muNational Sports Stadium nezuro ndokuramba iine mapoinzi maviri pamusore peFC Platinum iyo yakakunda Chapungu 1-0.
Asi murairidzi wemaGreen Machine, Darlington Dodo anoti pane zvakawanda zvinokwanisa kuitika mumitambo miviri yasara neNgezi Platinum Stars neFC Platinum Izvo zvinogona kuvatadzisa kutora mukombe mukuru uyu.
Mutambo neDynamos uyo wakaunganidza vanhu vakawanda asi hauna kunyanyonakidza sezvaitarisirwa.
Asi Dodo anoti vacharamba achiyedza nepese pavanogona kuti vanhonge mapoinzi munzira kuti vazadzikise chishuwiro chavo chekutora mukombe uyu uyezve nekumiririra nyika mumakundano eCaf Champions League egore rinotevera.
Kunyange hazvo vakarohwa muHarare Derby, murairidzi weDynamos Tonderai Ndiraya akafadzwa nematambiro evatambi vake vechidiki achiwedzera iye kuti maroto avo achiri ekuti vapedze vari pazvikwata zvina zvichange zviri pamusoro-soro panopera mwaka wenhabvu.
Pari zvino, Dembare iri pachinhanho chechinomwe yakaenzana pamapoinzi makumi mana nemana neNgezi Platinum Stars asi poindi imwechete pasi peHighlanders iyo yakarova Manica Diamonds 1-0 nechibodzwa chakakandwa naPrince Dube.
Mimwe mitambo yePSL yaiveko kapera seizvi ….
Bulawayo Chiefs 3 Chicken Inn 1
Hwange 2 Herentals 3
Mushowani 0 TelOne 2
Triangle 3 ZPC Kariba 0
Highlanders 1 Manica Diamonds 0
Kwatambwa mitambo makumi maviri nemiviri, zvikwata zvina zviri pamusoro-soro ndeizvi …
Caps United 58 points
FC Platinum 56 points
Chicken Inn 53 points
ZPC Kariba 46 points
Zvikwata zvina zviri pasi pasi ndeizvi…
Harare City 37 points
Yadah 35 points
Hwange 33 points
Mushowani 30 points.
Zvichakadaro, chikwata chekwaMutare cheTenax chabudirira kupinda muCastle Lager Premier Soccer League mushure mekurova Ruwa 2-0, ndokubatana neHwahwa, Bulawayo City, neCranborne Bullets, idzo dzakapinda muPSL kare.
Totarisa mutambo wetenesi.
VaBiggie Magarira ndivo vasarudzwa kuve mutungamiri weTennis Zimbabwe, iyo inotungamira mutambo wetenesi munyika,
VaMagarira vakasarudzwa pasina anopikisa mukupera kwesvondo uyezve vave kutsiva VaMartin Lock avo vakasiya basa.
VaMagarira vachange vachitevedzerwa naVaCollins Mahere mukuedza kusimudzira mutambo uyu, uyo wadzikira zvikuru kubvira apo Byron, naWayne Black vakamira kutamba.
Zimbabwe iyo yaimbove mugungano repamusoro-soro reWorld Group yadzika pasi zvekusvika muEuro-Africa Zone.
Facebook Forum