Mapurisa eZimbabwe Republic Police nekanzuru akapinda mumahofisi ekambani yenhau ye263 Chat nechisimba neChina akakanda hutsi hunokachidza, vatori venhau vakakuva pavaibuda nepamahwindo vachitiza.
Izvi zvakaitika mushure mekunge mumwe mutori wenhau we263 Chat, Lovejoy Mutongwizo, atora mifananidzo yemapurisa aya achirwisana nevanotengesera mumigwagwa pakati pemigwagwa Jason Moyo naFirst Street.
Mapurisa aona kuti ari kutorwa mifananidzo, akabva atanga kumudzingirira.
Mutongwizo akabva achinhanya achienda kumahofi avo ari paBatanai Gardens.
Mapurisa akamutevera kumahofisi aya vakamurova ari muhofisi ndokubva vazokanda hutsi hunokachidza.
Mapurisa aya anonzi akatora foni yemumwe mutapi wenhau we263 Chat, Costa Nkomo, pamwe nechikwama chake chakange chiine mari vachibva vaenda mushure mekukanda huchi hunokachidza.
Mumwe mutori wenhau, Precious Zhuwau, anoti akakuvara apo akabuda nepahwindo ave kukachidzwa nehutsi.
Mukuru wekambani ye263 Chat, VaNigel Mugamu, vaudza Studio7 kuti havana kufara nezvaitwa nemapurisa zvekuvadza vashandi vavo vari pabasa.
Vanoona nezvekufambiswa kwebasa musangano reZimbabwe National Editors Forum, VaNjabulo Ncube, vashora zvakaitwa nemapurisa vachiti vanhu vese vanorwisa vatapi venhau vane zvavanenge vachida kuvanza.
Vatiwo nenyaya yekuti vanhu vakawanda vave kushandisa madandemutande, mapurisa ave kushungurudza vatori venhau nekuti haadi kuti zvakashata zvaanoita zviburitswe pamadandemutande akasiyana.
Kukandwa kwakaitwa hutsi hunokachidza kwakanganisa mabhizimisi akawanda uye zvinonzi sangano remudzimai wemutungamiriri we nyika, Amai Auxillia, reAngel of Hope Foundation, iro rakange richida kuita musangano waro muThe Xenus iyo iri pamupanda mumwe ne263 Chat, rakatadza kuenderera mberi nemusangano waro sezvo vanhu vakange vave kukachidzwa nehutsi wemapurisa.
Zvichetevera kumhan’arwa kwenyaya iyi nevatori venhau, mapurisa ekuHarare Central akaenda kunobvurudza vamwe vashandi ve283 Chat uyewo akanotora teargas canister radonhera muhofisi ye263 Chat.
Mutauriri wemapurisa Assistant Commission Paul Nyathi vakati vari kuferefeta zvakaitika.
Hatina kukwanisa kunzwa kukanzuru yeHarare sezvo mbozhanhare yemutauriri wekanzuru, VaMichael Chideme, yange isiri kuita.
Facebook Forum