Sangano rinorwira kodzero dzevanhu, reCommunity Tolerance and Reconciliation Development Trust (COTRAD), iro rakambomiswa kuita basa nehurumende, rinoti rakaendesa mapepa kudare repamusoro nezuro kuti nyaya yavo inzwikwe zvechimbi chimbi.
Gweta reCOTRAD, VaDenford Halimani, avo vanoshanda neZimbabwe Lawyers for Human Rights, vaudza Studio 7 kuti vangangoshevedzwa kudare redzimhosva chero nguva.
Hurumende yakati iri kuongorora kuti sangano iri rine mapepa akakwana here.
Asi VaHalimani vanoti havawirirane nechikonzero ichi.
“Hapana mutemo unoti vanofanira kunyoresa kupi zvako pane zvavari kuita izvi. Kwemakore vanga vachishanda memapazi ehurumende mazhinji,” VaHalimani vaudza Studio 7.
Vakaenderera mberi vachiti, “COTRAD isangano rinozikanwa uye rinoremekedzwa saka zviri kuitwa nekutaurwa izvi zvinototikatyamadza zvikuru kuti vave kunzi vari kuita zvisiri pamutemo asi tanga tichishanda nehurumende kwemakore mazhinji.”
VaHalimani vati COTRAD ine zviuru zvishanu zvevanhu vanotarisira rubetsero kwairi saka zvaitwa nehurumende izvi zvinoisa vanhu vazhinji pakaoma.
Facebook Forum