America inoti ichabatsira kanzuru yeguta reHarare kuitira kuti ikwanise kupedzisa kuvandudza chipatara cheWilkins pamwe nekugadzirisa mamwe matambudziko akatarisana neguta guru renyika.
Vachitaura neStudio7 mushure mekusangana nemumiririri wemuzinda weAmerica muZimbabwe, Ambassador Brian Nichols, meya weguta reHarare, VaHerbert Gomba, vati vakumbira kubatsirwa kupedzisa hurongwa hwekuvakapachipatara cheWilkins uhwo hwakamira makore gumi nemaviri apfuura.
VaGomba vati kanzuru iri kuda mari inosvika mamiriyoni mashanu emadhora emuZimbabwe kuti vaenderere mberi nehurongwa hwepaWilkins.
VaGomba vatiwo vapira kuna VaNichols matambudziko avari kusangana nawo munyaya dzekuchenesa mvura yekunwa pamwe nedambudziko remvura dzetsvina.
Vatiwo vakurukura nezvekuvandudzwa kwematongerwo eguta kuitira kuti vapote vachipiwawo hunyanzvi.
Meya weHarare atiwo awirirana kushanda pamwechete neAmericamukugadzirisa nharaunda iri pedyo nekune muzinda uyu.
Ambassador Brian Nichols vatsigirawo vachiti vaita hurukuro vachitsanangurirwa matambudziko ari kusanganwa nawo neguta reHarare.
Kanzuru yeHarare inoti kuwondomoka kwehupfumi hwenyika kuri kukonzera kuti itadze kuita mabasa ayo nemazvo sezvo veruzhinji vari kutadzawo kubhadhara mitero kukanzuro yavo.
Facebook Forum