Mutungamiri wenyika, VaRobert Mugabe, neChitatu vakarumbidza China vachiti ishamwari yeZimbabwe yakakosha zvikuru, vakakumbira nyika iyi kuti ibatsire Zimbabwe mukumutsidzira hupfumi hwayo.
Vachitaura vari kuShangai Expo kuChina, VaMugabe vati hukama hweZimbabwe neChina hunofanirwa kuchengetedzwa, pamwe nekuremekedzwa sezvo China iri kubatsira Zimbabwe munyaya dzekusimudzira mabasa ekurima.
VaMugabe vakaenda kuChina neChipiri nemudzimai wavo, Amai Grace Mugabe, pamwe chete nemamwe makurukota ehurumende. Shangai Expo yakatanga mwedzi waChivabvu uye ichapera muna Gumiguru.
Nyanzvi inoongorora zvehupfumi, VaRejoice Ngwenya, vanoti VaMugabe havachina shamwari dzakawanda dzingavabatsire, izvo zvava kupa kuti vaende kuChina kunopemha.
