Mutungamiri wehurumende Va Morgan Tsvangirai, vari kutarisirwa kusvika muWashington neSvondo kuti vatambire mubairo wavari kupihwa ne National Democratic Institute.
Mubairo uyu unoremekedza vanhu vanorwira kodzero dzevanhu pasi rose. Va Tsvangirai vachatambidzwa mubairo uyu unonzi W. Averell Harriman Democracy Award nevaimbova gurukota rinoona nezvekunze kweAmerica, Amai Madeleine K. Albright.
Sangano re Choco Women of Columbia riri kuremekedzwawo ne NDI nemubairo uyu musi mumwe chete uyu. Mutauriri waVa Tsvangirai, Va James Maridadi, vati VaTsvangirai vari kutarisirwa kusanganawo zvakare nehutungamiriri hwenyika ye America pamwe nezvizvarwa zve Zimbabwe zviri muAmerica.
