Vaimbove mutungamiri weIreland, uye vari mutungamiri wesangano re Realising Rights, Amai Mary Robinson, vanoti vari kufara zvikuru nemafambiro akaita musangano wevanhukadzi wakapera neChina muZimbabwe.
Amai Robinson, avo vaive munyarikani pamusangano uyu, vanoti madzimai emuZimbabwe anoda rubatsiro, uye rutsigiro, kuitira kuti vazvisumudzire.
Musangano uyu wakarongwa nebazi rezvemadzimai, richishanda pamwe nebazi rezvekupodzwa kwemaronda nekugarisana kwakanaka, uye sangano reWomen’s Coalition of Zimbabwe.
Gurukota rezvekupodzwa kwemaronda nekugarisana kwanaka, Amai Sekai Holland, vanoti vanofara nekunyorerana pasi kwakaitwa nemadzimai anobva kumapato matatu ari muhurumende yemubatanidzwa, kuti aite mushandira pamwe pakurwira kodzero dzavo.
Musangano uyu wakapindwawo nemutungamiri wenyika, VaRobert Mugabe, mutungamiri wehurumende, VaMorgan Tsvangirai, pamwe nevamwe vakuru vakuru muhurumende.
