Vagari vemudhorobha reMasvingo vari kugara vakabatira hana mumaono zvichitevera kupupararira zvinotyisa kwechirwere cheCovid-1 pachikoro cheMasvingo Teachers College.
Pachikoro apa pane vadzidzi nevashandi makumi masere nemumwe vakabatwa nechirwere ichi nemusi weChishanu neMugovera. Nyaya yekuti chikoro ichi chiri pedyo neguta yave kupa kuti vakawanda vatye kutapurira chirwere cheCovid-19 panguva iyo zvisati zvajeka kuti mhando itsva yeomicron variant yakatanga kupararira kubva kuSouth Africa.
Vadzidzi vepachikoro ichi vakawanda vanogarawo neveruzhinji sezvo vachiroja.
Mumwe mugari wemumusha weHillside, Amai Joyce vanoti vari kutya zvikuru sezvo vachigara nevana vanodzidza pachikoro ichi.
Mukuru wechikoro cheMasvingo Teachers College, VaBenson Mutambudzi, varamba kutaura nevatori venhau nezvedambudziko iri vachiti bazi rezvehutano ndiro chete rinokwanisa kutaura nyaya yacho.
Asi sachigaro wesangano rakazvimirira roga rinorwira kodzero dzevanhu munyaya dzezvehutano rezveutano reCommunity Working Group on Health muMasvingo, Amai Entrance Takedza, vati hurumende inofanira kutora matanho akasimba sekuti vanhu vari panze vasapinde pachikoro ichi uye vari mukati vasabude vachisangana neveruzhinji senzira yekudzivirira kupararira kwechirwere ichi.
Mutauririri wekomiti yeCovid-19 Taskforce, muMasvingo, VaRodgers Irimayi vati huwandu hwevakabatwa nechirwere cheCovid-19 hunogona kukwira nhasi sezvo kuri kuvhenekwa vamwe vadzidzi, vadzidzisi nevashandi vepa chikoro apa.
VaIrimayi vati hurumende haaisati yazivisa kuti mhando yeCovid-19 iri pachikoro ichi ndeipi sezvo vakamirira kuudzwa nana mazvikokota vari kuHarare vari kuita ongororo parizvino.
Vamwe vagari vakaita saVaHardlife Tangayi, vanoti hurumende inofaira kuona kuti nzvimbo dzekutandarira dzeveruzjinji kunyanya mabhawa dzambovharwa sezvo vana vazhinji vekuzvikoro zvepamusoro vachishanyira nzvimbo idzi munguva dzekupera kwesvondo kundotsvaga mafaro. Vamwewo vagari vanoti dai hurumende yambovhara zvikoro vana vachidzidza pamadandemutande sezvo muzvikoro mave nevakavanda votapurirwa chirwere cheCovid-19. Denda iri rakamborova vana vepachikoro che Bondolfi Teachers College makumi mapfumbamwe chikavharwa pakati pegore.
Facebook Forum