Mutungamiri wenyika, VaRobert Mugabe, vanoti zvakakosha kuti vanhu vose vamanikidzwe kuti vatorwe ropa kuitira kuti vaonekwe kuti vane hutachiwona hweHIV/AIDS here kana kuti kwete.
VaMugabe vakataura mashoko aya muhurukuro yavakaita neChinese Television vachiti idzi ipfungwa dzavo kwete dzehurumende.
Mutungamiri wenyika akatiwo kumanikidza vanhu kuti vatorwe ropa kunobatsira mukudzivirira kupararira kwechirwere.
VaMugabe vanoti kana vanhu vaimanikidzwa kubayiwa majekiseni enhomba, kana kuti "small pox", hapana chakaipa kuita zvimwe chetezvo panyaya yeHIV/AIDS. Vakatiwo chinonetsa vanhu vanorwira kodzero dzevanhu, ndechekuti havadi kutambira pfungwa dzakaita sedzavo ivo VaMugabe.
VaBlessing Chebundo inhengo yekomiti yeparamende inoona nezvehutano. VaChebundo vanoti havawirirane nemashoko aVaMugabe.
Ukuwo nyanzvi inorwira kodzero dzevanhu vanorarama neHIV/AIDS, Doctor Frenk Guni, vanovazve mukuru webazi reHIV/AIDS and Public Health musangano reProgressive Health Partners, vanotiwo mashoko aVaMugabe haana chaanobatsira, uye kumanikidza vanhu kutyora kodzero dzavo.