Sangano rinomirira vashandi vehurumende munyaya dzemihoro, reApex Negotiating Council, rinoti harisi kufara nemashoko ebazi rezvemari ekuti hurumende haisi kuwedzera vashandi vayo mari.
Sangano iri rinoti mashoko aya achakonzera kusagadzikana muvashandi vehurumende sezvo vanga vakatarisira kuwedzerwa mari dzavanotambira.
Sachigaro weApex, Amai Tendayi Chikowore, vanoti vakumbira kusangana neChitatu svondo rinouya negurukota rezvevashandi vehurumende, VaEliphias Mukonoweshuro. Studio 7 haina kukwanisa kutaura naVaMukonoweshuro pamusoro penyaya iyi.
Vashandi vehurumende vari kuda kuti muhoro yavo iwedzerwe kubva paUS$165 kuti isvike pa US$600 pemwedzi. Asi hurumende inoti haina mari iri kudiwa nevashandi vayo.
Vashandi vehurumende vakambokanda mapadza pasi vachiti vanoda kuti mari dzavanotambira dzewedzerwe. Vakazodzokera kumabasa vachiti vari kupa hurumende nguva yekugadzirisa zvichemo zvavo.