Mapato ose ari muhurumende yemubatanidzwa anoti akafara zvikuru nezvakaitwa nemutungamiri weSouth Africa, VaJacob Zuma mukuyedza kupedza bopoto riri muhurumende yemubatanidzwa.
VaZuma vakasangana nevatungamiri vemapato ari muhurumende vakapa kurudziro yekuti mukupera kwemwedzi uno, nyaya dziri kunetsa pakati pemutungamiri wenyika, VaRobert Mugabe, nemutungamiri wehurumende, VaMorgan Tsvangirai, dzepere zvachose.
Asi vamwe vanoti mapato aya ari kukurumidza kumedza kutsenga achada, nekuti zvichanetsa kugadzirisa zviri kunetsa.
Vane maonero aya vanoti nyaya iyi ichatoguma yave kuSADC summit nekuti zvichanetsa kuti veZanu-PF neMDC vawirirana.
MuMDC munonzi hamuna kuwirirana panyaya yekuti ndiyani angasiiswe basa pakati pemuchuchusi mukuru wehurumende nagavhuna webhanga guru renyika.
Vamwe vakaoma musoro muZanu-PF vari kupikawo kuti mubato wehomwe muMDC, VaRoy Bennett, havafe vakaitwa mutevedzeri wegurukota rezvekurima, nekudaro vanofanira kuenda kune rimwe bazi.
Vanhu ava vanoti VaBennett, sezvo vakatorerwa purazi, vanogona kukanganisa zvinhu munyaya dzekurima. Zanu-PF iri kudawo kuti magavhuna ayo atange apedza temu yawo muna Nyamavhuvhu pasati pagadzwa matsva anosanganisa eMDC.
VaNelson Chamisa ndivo mutauriri weMDC inotungamirwa naVaTsvangirai.VaChamisa vanoti nyaya iyi ikasamba zvakanaka inofanira kuenda kuSADC.
Tabatawo mutauriri weMDC inotungamirwa naVaArthur Mutambara VaEdwin Mushoriwa. VaMushoriwa vanoti zviri kunetsa zvikapera nyika inokwanisa kufambira mberi mune zvakanaka.
Nhengo iri mukomiti yezvekuburitswa kwemashoko muZanu-PF, VaChris Mutsvangwa, vanoti vane chivimbo chekuti rwendo rwuno zvinhu zvichafamba negwara.