Boka reZimbabwe Electoral Commission rinoti mutungamiri wenyika VaRobert Mugabe chete ndivo vane simba rekutara nguva yesarudzo.
Boka iri riri kukwikwidza danho rekukwira kumatare rakatorwa nemagweta ari kumirira vaimbowe nhengo dzeparamende vachimirira MDC inotungamirirwa naVaArthur Mutambara, vakazodzingwa mubato iri, avo vari kuda kuti matunhu avo aitwe sarudzo dzeby-election.
Vatatu ava, vanoti vaimbomirira Nkayi South VaAbednico Bhebhe, vaimbomirira Lupane East VaNjabuliso Mguni, pamwe naVaNorman Mpofu vaimbomirira Bulilima East, vari kuda kuti matunhu avo aitwe sarudzo nechimbi chimbi, kuitira kuti vakwanise kukwikwidza.
Magweta avo akakwidza nyaya iyi kumatare vachida kuti VaMugabe vashevedzere sarudzo mumatunhu avaimbomirira.
Gweta riri kumirira vatatu ava, VaMatshobana Ncube vanoti chavari kuda kungoti VaMugabe vatare mazuva esarudzo.
