Sangano rinoongorora mafambisirwo esarudzo munyika, reZimbabwe Election Support Network, kana kuti Zesn, rinoti sarudzo ye by – election yaitwa ku Lupane East mudunhu re Matabeleland North, yafamba zvakanaka chose.
Zesn inoti yanga iine vaongorori makumi masere vanga vachiona mafambisirwo anga achiitwa sarudzo ne Zimbabwe Electoral Commission, kana kuti Zec.
Sarudzo iyi yapindwa nemapato mapfumbamwe.
Vanga vachikwikwidza musarudzo iyi ndiVa Dalumuzi Khumalo veMDC inotungamirwa naVa Nelson Chamisa; Va Mbongeni Dube ve Zanu PF;VaMorgen Ndlovu ve Labour, Economists and African Democrats Party; VaGiven Ncube veMDC inotungamirwa naMuzvare Thokozani Khupe; VaNelson Mkandla veNational Action Party; VaAndrew Tshaba veMthwakazi Republic Party; VaNjabulo Sibanda veNational Patriotic Front; VaGezekile Mkhwebu veZapu; pamwe naMuzvare Alice Sibanda veNational Constitutional Assembly.
Chigaro chemuriri weLupane East chakwikiwdzwa neMugovera zvichitevera kushaya muna Kubvumbi kwa Amai Sithembile Gumbo veZanu PF.
Zec, iyo yatotanga kuverenga mavhoti, ichazivisa akunda kana ichingeyapedza kuverenga mavhoti aya.
Studio7 haina kukwanisa kunzwa kudivi re Zec kuti ichazivisa nguvai zvabuda musarudzo iyi.
Mukuru webazi rinoongorora kufambiswa kwesarudzo muZesn, Va Ian Goredema, vanoti by election yekuLupane East yaitwa murunyararo, uye sangano ravo rafara nemabatirwo aiitwa basa neZec.
Facebook Forum