Nyanzvi mune zvekurima dziri kuyambira vanhu kuti vasakanganwa kuti mwedzi uno, waNdira, zvichienda mberi, inguva yechirwere chezvipfuyo, cheJanuary Disease, chinokonzerwa nezvishambwe panguva ino yekunaya kwemvura.
Munyori mukuru wesangano rinomirira varimisi, reZimbabwe Agricultural Professionals and Technical Association, VaZivaishe Zhou, vanoti varimi vanofanirwa kuchenjerera chirwere ichi, vachiti chinogona kunetsa pakati pemwedzi waNdira kusvika mumwedzi waKurume.
Asi vanoti chinogona kuramba chichinetsa kusvika mumwedzi waNyamavhuvhu, sezvachakaita gore rapera.
VaZhou vanoti sangano ravo rinorumbidza hurumende pamatanho ayakavimbisa kutora panyaya yemadhibha kuti zvipfuyo zvevanhu zvichengetedzwe.
Vanoti hurumende yakavimbisa kuvaka zviuru zvemadhibha munyika.
VaZhou vanokurudzira vanhu kuti vateerere zvavanoudzwa nenyanzii dzezvekurima, vakaita sevadhomeni, vachiti ino inguva yechirwere ichi chinogona kuvhiringa mombe.
Facebook Forum