Sangano rinomiririra vadzidzisi vekumaruwa, reAmalgamated Rural Teachers Union of Zimbabwe, kana kuti ARTUZ, ranyora tsamba kuhurumende richiizivisa kuti nhengo dzaro dzicharega mabasa kwenguva isingazikanwi kutanga musi wa 7 Ndira, kusvika hurumende yagadzirisa zvese zviri kunetsa vadzidzisi.
Mutungamiriri wesangano iri, VaObert Masaraure, vaudza Studio 7 kuti hazvina zvazvinobatsira kuti zvikoro zvivhurwe zvinhu zvakawanda zvichida kugadziriswa sezvo vana vechikoro vasingazowani batsiro rwavanofanira kuwana kubva kuvadzidzisi nehurumende.
Asi mutungamiriri werimwe sangano rinomiririra vadzidzisi, reProgressive Teachers Union of Zimbabwe, Doctor Takavafira Zhou, vaudza Studio 7 kuti zvirikurongwa ne ARTUZ hazvina kuipa asi zvaibatsira chose kuti masangano ese aise musoro pamwe chete vataure nehurumende nenzwi rimwe chete.
Facebook Forum