Mamwe magweta anorwira kodzero dzevanhu anoti anotambira nemufaro hurongwa hweJudicial Services Commission hwekuda kuita mimwe mizinda yematare epamusoro mudzimwe nzvimbo dziri kunze kweHarare neBulawayo.
Vachipa maonero esangano ravo pamusoro pahurongwa uhu, mutauriri wesangano reZimbabwe Lawyers for Human Rights, VaKumbirai Mafunda, vaudza Studio 7 kuti sangano ravo rinotambira nekutsigira hurongwa hwekuti dare repamusoro reHigh Court rive nemimwe mizinda mumadhorobha madiki.
Vachitaura pakutanga kwesvondo rino pakuvhurwa kwemwaka wekutanga wedare iri wegore rino muBulawayo, mukuru weHigh Court, Justice George Chiweshe, vakati Judicial Services Commission iri kuenderera mberi nehurongwa hwekuti nzvimbo dzaive macircuit court edare iri munyika dzive mahofisi eHigh Court akazvimirira pachawo ega.
VaMafunda vanoti kuita izvi kuchawedzera kune veruzhinji mikana yekushandisa dare iri kupfuura zviri kuitika pari zvino.
Munyika mune mahofisi maviri chete eHigh Court muHarare neBulawayo, uye dare iri rinogara kwemavhiki maviri katatu pagore kunzwa nyaya dzinenge dzaunzwa kudare iri muGweru, Hwange/Lupane, Masvingo neMutare.
KuMasvingo ndiko kuchatanga kuve neimwe hofisi yedare iri uye VaChiweshe vakati kuvepo kwemamwe mahofisi kune dzimwe nzvimbo kunotarisirwa kurerutsa basa redare iri.
Mukuru wezvirongwa musangano reAbammeli Human Rights Lawyers, VaTineyi Mukwewa, vanoti kuve nemamwe mahofisi eHigh Court munyika kuchabatsirawo kuti veruzhinji vave nechido chekushandisa matare edzimhosva pane nechivimbo chekuti matare aya anoshanda zvakanaka mukugadzirisa nyaya dzavanenge vainadzo.
VaMafunda vanotiwo kunze kwekuve nemahofisi edare iri mudzimwe nzvimbo, hurumende inofanirwa kuona kuti pane mari yakakwana yekuita kuti dare iri rive nevanhu vakafanira kuitira kuti rigokwanisa kuramba richifambisa mabasa aro nemazvo.
Nyanzvi munyaya dzemitemo dzinoti Zimbabwe iri kushandisa nguva yakawanda pamwe nemari yakawanda yekuti nyaya dzinoparwa mumatunhu dzinge dzichinzwikwa mumaguta makuru.
Izvi zvinoomerawo magweta anoshandira ari mumatunhu aya sezvo achisungirwa kumirira vanhu vavo muBulawayo kana muHarare.
Nyika zhinji dzepasi rose dzine matare epamusoro anomirira matunhu emunyika idzi izvo zviri kupa kuti Zimbabwe isaririre.