Sangano remakerereke, reZimbabwe Council of Churches, ZCC, ririkuita misangano nemadzishe nevagari vemumatunhu eMatebeleland richitsvaka nekukurudzira nhaurirano pamwe chete nekugadzira nzira yekuti kusagarisana kwakaitika kare kukurukurwe pachena.
Munyori we ZCC, Mufundisi Kenneth Mtata, vaudza Studio 7 kuti nezuro kuHwange sangano ravo rakaita musangano mukuru nemadzishe nevamwe vakuru vedunhu reMatebeleland North.
Izvi zvinotevera misangano yavakaita kuMatebeleland South nemu Bulawayo mwedzi mishoma yapfuura.
Mufundisi Mtata vati zvimwe zvezvinoramba zvichitaurwa mumisangano iyi zvinosanganisa chichemo chekuti mari inobva mukutengeswa kwezviwanikwa zvemumatunhu aya idzorerwe mumatunhu aya mekare kuti abudirire uye kuti isimudzire mabasa munzvimbo idzi.
Vanoti vanhu vazhinji vanoda kuti vezvematongerwo enyika vaite nhaurirano dzekuti nyika igadzikane uye kuti ifambire mberi.
Facebook Forum