Sangano reZimbabwe Council of Churches (ZCC) rinoti vatori venhau vane basa rekubatanidza vanhu pamwe nekutanga nhaurirano dzinoendesa nyika mberi richiti pari zvino handizvo zviri kutika sezvo vamwe vavo vari kutora mativi emapato ari kukakavadzana munyika.
Vachitaura pamusangano wavaita nenhengo dzeZImbabwe National Editors Forum muHarare, munyori mukuru weZCC , Doctor Kenneth Mtata, vati vapepeti nevatori venhau pamwe nevedzisvondo vanofanira kufambisa mashoko anovaka nyika.
Reverend Mtata vati apo zviri pachena kuti vanhu vemuZimbabwe vanoda kutaurirana nekushanda pamwe chete kuti nyika ibudirire, pane vamwe vasiri kuda izvi uye pane vamwe vatori venhau vave kupembembedza vanhu ava.
Vati tariro yavo ndeyekuti vatori venhau nevapepeti vadzo vachaita basa ravo nemazvo apo vanhu munyika vari kuedza kutaurirana nekugadzirisa matambudziko ari munyika.
Mupepeti webepanhau reThe Observer, VaBarnabas Tondhlana, vati vanotambira maonero eZCC, uye vane matanho avari kutora kuti nhengo dzesangano ravo dziiite basa sezvinotarisirwa neveruzhinji.
Mukuru weMedia Centre, VaEnerst Mudzengi, vaudza Studio7 kuti zvingave zvinosuwisa chose kana paine vatori venhau vanyora nhau dzinoparadzanisa vanhu munyika.
VaMudzengi vati pane zvikonzero zvakawanda zvinotadzisa vatori venhau kuita basa ravo nemazvo.
Reverend Mtata vati mwedzi unoouya varonga musangano uchapindwa nevemapato ese ezvematongerwo enyika, vedzisvondo nemasangano akazvimirira uchazeya kuti nhaurirano dzekuti vanhu vabatane nekushanda pamwe dzingaitwe negwara ripi.
VaMtata vati kunyange hazvo sangano ravo riri kukurudzira nhaurirano idzi pamutemo havana mvumo yekutungamira nhaurirano idzi uye vanoona sekuti komisheni yeNational Peace and Reconciliation Commission ndiyo yakakodzera kutungamira nhaurirano idzi.
Vati zviri pachena kuti vanhu vanoda nhaurirano nekushanda pamwe chete kuitira kuti nyika ifambire mberi.
ZCC yakamboedza kuti mutungamiri wenyika, VaEmmerson Mnangagwa, pamwe nemutungamiri weMDC, VaNelson Chamisa, vataurirane, asi izvi hazvina kushanda.
Facebook Forum