Kuchange kusingadaidzwe anonzwa mangwana apo vatsigiri vemutambo wenhabvu muguta reMasvingo vachange vachiona zvikwata zvavo zviri munhandare mushure memakore maviri kusina mitambo yenhabvu nekuda kwedenda reCovid-19.
Zvikwata zveZIFA Eastern Region Division One zviviri zvemuguta reMasvingo zvinoti Masvingo United FC neWangu Mazodze FC,zvichange zviri muMucheke Stadium mukupera kwezvondo.
Mangwana, chikwata chitsva cheWangu Mazodze FC chiri kutamba nechikwata cheLowveld FC munhandare yeMucheke.
NeSvondo munhandare iyi munege mune mumwezve mutambo pakati peMasvingo United FC ne Greenfuels FC.
Mumwe mutsigiri wenhabvu wemumusha weRunyararo West, VaHardlife
Tangayi, vanoti vari kufarira zvikuru kudzoka kwemutambo wenhabvu
nekuti vakange vasina zvinovavaraidza pakupera kwesvondo vasingaindi
kumabasa.
Mumwe mutsigiri wenhabvu, VaThomas Mwenje, vanoti vanovimba kuti kudzoka kwenhabvu uku kucharamba kuripo kana denda rikasaramba richiwedzera kuitira kuti vatambi vanorarama nemutambo wenhabvu sebasa, vakawanise kuriritira mhuri dzavo.
Mutauririri wechikwata cheWangu Mazodze FC, Muzvare Bridget Mhare,
vavimbisa vatsigiri vange vave nenyota yenhabvu kuti chikwata chavo
chichavapakurira nhapitapi apo chichange chichitamba neLowveld FC vachiti vanotarisira kukunda zvine mutsindo.
Muzvare Mhare vanoti vakaumba chikwata chakasimba uye vanovimba
kuti sevatsva muDivision One havana kuuya kuzowedzera huwandu
hwezvikwata zvenhabvu asi vakauya kuzokwikwidza zvine mutsimbo
vakwanisewo kuenda mberi.
Sachigaro weMasvingo United inozivikanwa nezita remadunhurirwa
rekuti Una Una , VaHubert Fidze, vavimbisawo vatsigiri vavo kuti
vauye nehuwandu hwavo vazonakidzwe nebhora remhando yepamusoro sezvo vange vari shuwa kwenguva yakareba.
Vanhu zviuru zviviri ndivo chete vachabvumidzwa kupinda munhandare, uye mari yepasi kuona mitambo iyi inenge iri dhora rimwe chete pamunhu.
Macheke inhandare inopinda vanhu zviuru gumi.
Eastern Region Divison One ine zvikwata gumi nezvitanhatu izvo
zvichange zvichikweshana kuti zviwane mukana wekupinda mumakundano enhabvu yepamusoro munyika ePremeir Soccer League gore rinouya.
Facebook Forum