Sangano ravana chiremba vanorwira kodzero dzevanhu munyika, re Zimbabwe Doctors for Human Rights, rinoti Dr. Peter Magombeyi vabuda munyika vachienda kunorapwa ku South Africa.
Dr. Magombeyi vasvika muSouth Africa manheru eChina.
Sangano iri rinoti riri kufara zvikuru kuti Dr. Magombeyi, avo vakafanobata chigaro chemutungamiri we Zimbabwe Hospital Doctors Association, vakwanisa kukwira ndege vachienda ku South Africa kuitira kuti vanorapwa.
Mutauriri wesangano iri, Dr. Fortune Nyamande, vanoti Dr. Magombeyi munhu anoda kurapwa zvechimbi chimbi nenyanzvi sezvo hutano hwavo hwakavhiringwa pavakanga vari muhunhapwa.
Dr. Nyamande vabvumawo kuti ichokwadi kuti Dr. Magombeyi vasvika muSouth Africa, asi havana kuda kutaura zvakawanda pamusoro penzvimbo ichange ichirapirwa Dr. Magombeyi.
Dr Magombeyi vakapambwa musi waGunyana 14 nevanhu vasiri kuzivikanwa kuti ndivanani asi vakazowanikwa musi waGunyana 19 vari kuNyabira.
Dr. Magombeyi vanonzi vakatochwa zvakaipisisa pavaive muhunhapwa, uye izvi zvakabudawo muongororo inonzi yakaitwa navana chiremba vanorwira kodzero dzevanhu pamwe navana chiremba vaimirira hurumende.
Asi mubvunzo mukuru uri kushaya mhinduro ndewekuti Dr. Magombeyi vakatochwa nani?
Mutongi wedare repamusoro, VaHappias Zhou, vakatura mutongo nemusi weChipiri vachiti Dr. Magombeyi vanofanirwa kunorapwa kwavanoda.
Asi mapurisa akarambidza Dr. Magombeyi kubuda muchipatara mavakanga vari.
Mumwe mutongo wakaturwa zvakare naVaGeorge Chiweshe avo vakati mapurisa haafanirwe kudzivisa kana kutadzisa Dr. Magombeyi kubuda munyika vachienda kunorapwa kuSouth Africa.
Tsvagiridzo yaitwa neStudio7 inoratidza kuti Dr. Magombeyi vabuda munyika vachishandisa ndege yeSouth African Airways Flight Number SA029 iyo yasimuka muHarare na 5:10pm kunyange hazvo yanga ichifanirwa kusimuka na 5:06pm.
Ndege iyi, iyo inova yemhando ye Airbus 320-232, yamhara panhandare yemuJohannesburg na 6:39pm mushure mekupedza awa imwe chete nemaminetsi makumi matatu nematatu iri mudenga kunyange hazvo ndege iyi yanga yakatarisirwa kumhara na6:50pm.
Dr. Magombeyi vachange vachirapwa vari muSouth Africa kusvika vava kunzwa zvakanaka.
Hazvisati zvozivikanwa kuti Dr. Magombeyi vachange vachirapirwa pachipatara chipi, uye kuti ndiyani achange ari mukuru wevana chiremba vachange vachirapa Dr. Magombeyi.
Pari zvino vanachiremba vaDr. Magombeyi muZimbabwe vanoti Dr. Magombeyi vanofanirwa kumbosiyiwa vari vega kudzamara vanachiremba vagutsikana kuti vachionekwa neveruzhinji.
Facebook Forum