Vagari vakawanda vekuDomboshava mumusha wekwaZimbiru munzvimbo yaIshe Chinhamhora kuGoromonzi vari kutya kuti vanogona kubviswa munzvimbo yavo kuitira kuti imwe kambani yekuChina, yeGeo Global ivhure mugodhi wekuchera matombo ekuvakisa kana kuti Quarry Mining munzvimbo iyi.
Vachitaura pamusangano wavakaita neMugovera nemumiriri wenzvimbo iyi, VaEnergy Mutodi, paZimbiru Primary School, vagari venzvimbo iyi vakati havasi kufara kuti kanzuru yeGoromonzi pamwe nemadzishe inzvimbo iyi, vakatopa kambani yekuChina iyi mvumo yekuchera kwari munzvimbo iyi vasina kunzwa pfungwa dzavo.
Vakati nyanzvi dzakavaudza kuti kuti kambani iyi, itange kudhuura matombo, vese vanogara makiromita mashanu kubva pagomo reZimbura vanofara kubva munzvimbo iyi kuti vasakuvare.
Asi vagari vakaita saAmai Folerence Chipurunya vakaudza Studio 7 kuti havana kwavari kuzoenda.
VaTinashe Chimedza vakatiwo kunyange hazvo budiriro yakanaka, havana chivimbo chekuti maChina angaunze budiriro munzvimbo mavo kana vakatarisa zvakaitika kunze dzimwe nzvimbo dzakaita seChiadzwa kwaMarange kuManicaland.
Nhengo yekomiti yakadomwa nevagari kuti vaongorore kuuya kwekambani iyi muDomboshava, VaTineyi Munetsi, vakaudza Studio7 kuti masabhuku, Ishe Chinamhora nekanzuru vakaita zvinhu zvavo muchihwande uye ndosaka pave nemutauro.
Vachitaura mushure mekunzwa zvichemo zvevagari, VaMutodi vakati havana zvavanoziva nezvenyaya iyi, uye vave kuiongorora.
Vakatiwo hapana achabvisa vagari pamisha yavo uye vanofanira kugara vasina chavanotya.
Hatina kukwanisa kunzwa kubva kukambani ye Geo Global, kanawo kubata Ishe Chinhamhora kuti tinzwe divi ravo panyaya iyi.
Sangano remagweta anorwira kodzero dzevanhu eZimbabwe Lawyers for Human Rights rinoti rakatambira chichemo kubva kune vamwe vagari vekuDomboshava pamusoro penyaya iyi uye rave kuiongorora.
Pasi pebumbiro remitemo yenyika, hurumende inokomekedzwa kutanga yatsvagira vanhu pekugara isati yavabvisa munzvimbo dzavanogara.
Asi zvakaitika kwaChiadzwa makore apfuura, uko vanhu vakabviswa muminda yemangoda zvechimbi chimbi, zvinopa vagari vekuDomboshawa kuti vagare vakabatira ura mumaoko nekutyira remangwana ravo.
Facebook Forum